ଦ୍ୱିତୀୟ ଶ୍ରୀକ୍ଷେତ୍ର ବାରିପଦାରେ ରଥଟଣା ସମ୍ପୂର୍ଣ୍ଣ..

ବାରିପଦା, ନିରପେକ୍ଷ ଖବର:୬/ଜୁଲାଇ/୨୦୧୯, ଦ୍ୱିତୀୟ ଶ୍ରୀକ୍ଷେତ୍ର ବାରିପଦାରେ ଶ୍ରୀଶ୍ରୀ ହରିବଳଦେଵ ଜୀଉଙ୍କ ରଥଯାତ୍ରା ସ୍ୱତନ୍ତ୍ର ରୀତିନୀତି ଅନୁଯାୟୀ ପାଳିତ ହୋଇଯାଇଛି। ବିଶେଷକରି ବାରିପଦାରେ ଦେବୀ ସୁଭଦ୍ରାଙ୍କ ରଥ କେବଳ ମହିଳାମାନେ ଟାଣିବାର ସୁଯୋଗ ପାଇଥାନ୍ତି। ଯାହା ବିଶ୍ୱରେ ଏଭଳି କେଉଁଠି ଦେଖିବାକୁ ମିଳେନାହିଁ। ମାତୃଶକ୍ତି ହେଉଛନ୍ତି ସୃଷ୍ଟିର ନିଅନ୍ତା, ମା ହେଉଛନ୍ତି ଜଗତର ଜନନୀ। ସେଥିପାଇଁ ବାରିପଦାରେ ସମଗ୍ର ନାରୀଶକ୍ତିକୁ ସମ୍ମାନ ଦେବା ପାଇଁ କେଉଁ ଆବାହନ କାଳରୁ ଆଜି ପର୍ଯ୍ୟନ୍ତ ଏହି ପରମ୍ପରା ଉଦଜୀବିତ ହୋଇରହିଛି। ରୀତିନୀତି ଅନୁସାରେ ଶୁକ୍ରବାର ପ୍ରଭୁ ବଳଭଦ୍ରଙ୍କର ରଥ ଟଣା ଯାଇଥିବା ବେଳେ ମା’ ସୁଭଦ୍ରାଙ୍କର ରଥ ଟଣାଯାଇ ମାଉଷୀମା ମନ୍ଦିର ପୂର୍ବରୁ ଅଟିକି ରହିଥିଲା। ସେହିପରି ଅଧା ବାଟରେ ଅଟିକି ରହିଥିବା ଦେବୀ ସୁଭଦ୍ରାଙ୍କ ରଥ ଶନିବାର ଦିନ ଅପରାହ୍ନ 3ଟା ସମୟରେ ବିଧି ଅନୁସାରେ ମା’ସୁଭଦ୍ରାଙ୍କ ରଥକୁ ମହିଳା ଭକ୍ତମାନେ ମାଉସୀମା ମନ୍ଦିର କୁ ଟାଣି ନେଇଥିଲେ। ଏହାପରେ ଲକ୍ଷାଧିକ ଭକ୍ତ ପ୍ରଭୁ ଜଗନ୍ନାଥଙ୍କ ରଥ ଟାଣି ମାଉଷୀମା ମନ୍ଦିର ନିକଟରେ ପହଞ୍ଚାଇଥିଲେ। ରଥଯାତ୍ରା ଦେଖିବାକୁ ମୟୁରଭଞ୍ଜ ଜିଲ୍ଲା ତଥା ପଡୋଶୀ ରାଜ୍ୟ ଝାଡ଼ଖଣ୍ଡ, ପଶ୍ଚିମବଙ୍ଗରୁ ଲକ୍ଷାଧିକ ଭକ୍ତଙ୍କ ସମାଗମ ହୋଇଥିଲା। ପରମ୍ପରା ଅନୁଯାଇ ଶ୍ରୀକ୍ଷେତ୍ର ପୁରୀରେ ପ୍ରଭୁ ଜଗନ୍ନାଥଙ୍କ ରଥଯାତ୍ରାର ଗୋଟେ ଦିନପରେ ବାରିପଦାରେ ଦୁଇଦିନିଆ ରଥଟଣା କାର୍ଯ୍ୟକ୍ରମ ଅନୁଷ୍ଠିତ ହୋଇଥାଏ। ଆଜି ରଥଟଣା ରେ ଜିଲ୍ଲା ପ୍ରଶାସନ ପକ୍ଷରୁ ତ୍ରୁଟି ଦେଖିବାକୁ ମିଳିଛି। ପୁଲିସ ପ୍ରଶାସନର ମନମୁଖୀ କାର୍ଯ୍ୟ ଯୋଗୁଁ ରଥଟାଣିବାକୁ ଆସିଥିବା ମୟୁରଭଞ୍ଜ ସାଂସଦ ଓ ବାରିପଦା ବିଧାୟକ ହଟହଟା ହୋଇଛନ୍ତି। ସୁରକ୍ଷା କର୍ମୀମାନେ ସାଂସଦ ଓ ବିଧାୟକଙ୍କୁ କର୍ଡନ ଭିତରକୁ ପୁରାଇ ଦେଇନଥିଲେ। ଯାହାକୁ ନେଇ ରଥ ଟଣା ସମୟରେ ଉତେଜନା ପ୍ରକାଶ ପାଇଥିଲା। ଯାହା ପ୍ରଶାସନିକ ବିଫଳତା ପଦାରେ ପଡିଥିବା ଦେଖିବାକୁ ମିଳିଥିଲା।
ଶନିବାର ଦିବା ୨:୩୦ଘଟିକା ରଥଟଣା କାର୍ଯ୍ୟ ଆରମ୍ଭ ହୋଇଥିବା ବେଳେ ସନ୍ଧ୍ୟା ୫:୦୦ ମିନିଟି ସମୟରେ ମାଉସୀ ମା’ମନ୍ଦିର ନିକଟରେ ପହଞ୍ଚିଥିଲା।ଆଜି ରଥଯାତ୍ରା ରେ ବିଧାନସଭା ର ପୂର୍ବତନ ଉପବାଚସ୍ପତି ସାନନ୍ଦ ମାରାଣ୍ଡି, ମୟୁରଭଞ୍ଜ ସାଂସଦ ବିଶ୍ୱେଶ୍ୱର ଟୁଡୁ, ରାଜ୍ୟସଭା ସାଂସଦ ସରୋଜିନୀ ହେମ୍ବ୍ରମ, ସ୍ଥାନୀୟ ବିଧାୟକ ପ୍ରକାଶ ସରେନ ଉପସ୍ଥିତ ଥିଲେ।