ବାରିପଦା(ନିରପେକ୍ଷ ଖବର)ତା-୧୬/ଅଗଷ୍ଟ/୨୦୧୯- ମୟୁରଭଞ୍ଜ ଜିଲ୍ଲାରେ ପୁଣି ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ଜାତିପ୍ରଥାକୁ କେନ୍ଦ୍ରକରି ଘରେ ଦୁଇଦିନ ପଡ଼ିରହିଲା ଶବ। ଘଟଣାସ୍ଥଳରେ ପୁଲିସ ପହଂଚି ଦୁଇ ପରିବାର ଭିତରେ ଲିଖିତ ଚୁକ୍ତିନାମା କରିବା ପରେ ଶବକୁ ନ୍ୟାୟ ମିଳିଛି। ଆଦିବାସୀ ଅଧୁସିତ ମୟୁରଭଞ୍ଜ ଜିଲ୍ଲାର କୁଳିଅଣା ଥାନା ଅନ୍ତର୍ଗତ କୁଚେଇ ଅଞ୍ଚଳରେ ଏଭଳି ଏକ ଲୋମହର୍ଷଣକାରୀ ଓ କୁସ୍ଚିତ ଘଟଣା ଦେଖିବାକୁ ମିଳିଛି। ମୂର୍ତ ମହିଳାଙ୍କର ବାପ ଘର ଓ ଶଶୁର ଘର ମଧ୍ୟରେ ପୂର୍ବରୁ ଚୁକ୍ତି ହୋଇଥିବା ଜାତିପ୍ରଥା ପଣ ବିବାଦର ସମାଧାନ ନହେବ ପର୍ଯ୍ୟନ୍ତ ମୃତ ଶରୀରର ଶବ ସତ୍କାର ନ କରାଇବାକୁ ଜିଦ ଧରି ବସିଥିଲେ ବାପଘର ଲୋକ। ଏଭଳି କଙ୍ଗାରୁ କୋର୍ଟର ଫାଇନ ଭଳି ଘଟଣା ମୟୁରଭଞ୍ଜ ଜିଲ୍ଲାରେ ଦେଖିବାକୁ ମିଳିଛି। ସୂଚନା ଅନୁଯାୟୀ ଗତ ୧୦ ବର୍ଷ ପୂର୍ବରୁ କୁଚେଇ ଅଞ୍ଚଳର କାନ୍ଦ୍ରା ସୋରେନ ପଳାଶବନି ଅଞ୍ଚଳର ପାର୍ବତୀ ସୋରେନକୁ ପ୍ରେମ ବିବାହ କରିଥିଲେ। ତେବେ ବିବାହ କରିବା ସମୟରେ ଜାତିପ୍ରଥା ନିୟମ ଅନୁସାରେ ବିବାହ କରିଥିବା କାନ୍ଦ୍ରା ସୋରେନ ପଣ ଦେଇନଥିଲେ।ଯେଉଁଥି ପାଇଁ ବିଭିନ୍ନ ସମୟରେ ଦୁଇ ପରିବାର ଭିତରେ ଗଣ୍ଡଗୋଳ ହେଉଥିଲା। ମାତ୍ର ଗତ କିଛିଦିନ ପୂର୍ବରୁ କାନ୍ଦ୍ରା ସୋରେନର ସ୍ତ୍ରୀ ପାର୍ବତୀ ସୋରେନଙ୍କ ଦେହ ଅସୁସ୍ଥତା ହୋଇପଡିଥିଲା। ଗତ କାଲି (ଗୁରୁବାର) ଭୋର ସମୟରେ ପାର୍ବତୀ ସୋରେନଙ୍କ ମୃତ୍ୟୁ ହୋଇଥିଲା। ମୁର୍ତ୍ୟୁ ଖବର ଶୁଣି ତା’ର ବାପଘର ଲୋକମାନେ ଝିଅର ଶଶୁର ଘରେ ପହଞ୍ଚିଥିଲେ। ପୂର୍ବରୁ ଦୁଇ ପରିବାର ମଧ୍ୟରେ କଥା ହୋଇଥିବା ଜାତିପ୍ରଥା ପଣ ବିବାଦର ସମାଧାନ ନହେଲେ ଶବ ସେହିଭଳି ପକେଇ ରଖିବାକୁ ଜିଦ ଧରି ବସିଥିଲେ। ଜାତିପ୍ରଥା ପଣ ଦେଲେ ଯାଇ ମୃତ ଶରୀର ଶବଦାହ କରିବାକୁ ସେମାନେ କହିଥିଲେ। ଏହାକୁ ନେଇ ଦୁଇ ପରିବାର ମଧ୍ୟରେ ଗଣ୍ଡଗୋଳ ଭଳି ପରିସ୍ଥିତି ଉପୁଜିଥିଲା। ମୃତ ପାର୍ବତୀ ସୋରେନଙ୍କ ସ୍ୱାମୀ କାନ୍ଦ୍ରା ସୋରେନ ଏହାର ସମାଧାନ ପାଇଁ ୩ ମାସ ସମୟ ମାଗିଥିଲେ। ହେଲେ କାନ୍ଦ୍ରା କଥାରେ ସହମତି ହୋଇନଥିଲେ ମୃତ ପାର୍ବତୀଙ୍କ ଘରଲୋକେ। ଫଳରେ ଶବର ସତ୍କାର ନକରି ବାସୀ ଶବକୁ ସେଭଳି ଘର ଭିତରେ ପକାଇ ରଖିଥିଲେ। ତେବେ ଘଟଣାର ଖବର ପାଇ ପ୍ରଥମେ କୁଳିଅଣା ପୋଲିସ ଘଟଣା ସ୍ଥଳରେ ପହଞ୍ଚି ଦୁଇ ପରିବାରକୁ ବୁଜାସୁଜା କରିଥିଲେ ମଧ୍ୟ ସେମାନେ କେହି ବୁଝିବାକୁ ରାଜି ହୋଇ ନଥିଲେ। ଫଳରେ ଦୁଇ ପରିବାର ମଧ୍ୟରେ ଆହୁରି ତିକ୍ତତା ବଢ଼ିବାରେ ଲାଗିଥିଲା। ପରେ ଅତିରିକ୍ତ ଆରକ୍ଷୀ ଅଧିକାରୀ ବାରିପଦାରୁ ଯାଇ ଏହାର ସମାଧାନ ପାଇଁ ଦୁଇ ପରିବାର ମଧ୍ୟରେ ଏକ ଲିଖିତ ଚୁକ୍ତିନାମା କରାଇଥିଲେ। ଲିଖିତ ଚୁକ୍ତିନାମା ହେବା ପରେ ମୃତ୍ୟୁ ଶରୀରକୁ ବ୍ୟବଛେଦ ପାଇଁ ବାରିପଦା ପଣ୍ଡିତ ରଘୁନାଥ ମୁର୍ମୁ ମେଡିକାଲକୁ ନିଆଯାଇଥିଲା।
ତେବେ ଆଧୁନିକ ଭାରତରେ ଅନ୍ଧବିଶ୍ୱାସ ଓ କୁସଂସ୍କାରର ସ୍ଥାନ ନଥିବା ବେଳେ ମୟୁରଭଞ୍ଜରେ ଜାତିପ୍ରଥାକୁ ନେଇ ଦୁଇ ପରିବାର ମଧ୍ୟରେ ଉପୁଜିଥିବା ଏଭଳି ଘଟଣା ସାଧାରଣରେ ଆଲୋଚନାର ବିଷୟ ପାଲଟିଛି।
