ସ୍ୱଧାର ଗୃହରୁ ଦୁଇ ଅନ୍ତେବାସୀଙ୍କୁ ନେଇ ଚମ୍ପଟ ମାରୁଥିବା ଅଭିଯୁକ୍ତ ଗିରଫ ।

ବାରିପଦା(ନିରପେକ୍ଷ ଖବର)ତା-୯/ଡିସେମ୍ବର/୨୦୧୯: ସ୍ଥାନୀୟ ସ୍ବଧାର ଗୃହରୁ ୮ଦିନ ଧରି ନିଖୋଜ ଥିବା ଦୁଇ ଜଣ ଅନ୍ତେବାସୀଙ୍କୁ ଉଦ୍ଧାର କଲା ବାରିପଦା ଟାଉନ ଥାନା ପୁଲିସ। ଅଭିଯୁକ୍ତମାନେ ଅନ୍ତେବାସୀମାନଙ୍କୁ ନେଇ ରାସଗୋବିନ୍ଦପୁର ଦେଇ ପଶ୍ଚିମବଙ୍ଗ ନେଇଯାଉଥିବା ବେଳେ ପୁଲିସ ସେମାନଙ୍କୁ କାବୁ କରିବାରେ ସକ୍ଷମ ହୋଇଛି। ପୁଲିସ ଦୁଇ ଯୁବତୀଙ୍କୁ ଉଧ୍ଯାର କରିବା ସହିତ ଅଭିଯୁକ୍ତଙ୍କୁ ଗିରଫ କରିଛି। ଅଭିଯୁକ୍ତମାନେ ହେଲେ ସ୍ଥାନୀୟ ଶୁନଗଡିଆ ଅଞ୍ଚଳର ରବୀ ମୁଖୀଙ୍କ ପୁଅ ପପୁ ମୁଖୀ(୨୨) ଏବଂ ଜିତୁ ବନ ସିଂଙ୍କ ପୁଅ ବିନୋଦ କୁମାର ସିଂ ଓରଫ (କୁନା)। ସ୍ୱଧାର ଗୃହରେ ଫେରାର ହୋଇଯାଇଥିବା ଯୁବତୀମାନେ ହେଲେ ବାରିପଦା ପୌରପାଳିକାର ୱାର୍ଡ ନଂ-୨୦ ଶୁନଗଡିଆ ଅଞ୍ଚଳର ଜଣେ ନାବାଳିକା ଓ ପଶ୍ଚିମବଙ୍ଗର ଜଣେ ୨୨ ବର୍ଷୀୟା ଯୁବତୀ। ସେମାନେ ଗତମାସ ୩୦ ତାରିଖ ରାତିରେ ସୁଧାର ଗୃହ କବାଟ ଭାଙ୍ଗି ବାଉଁଶ ସାହାଯ୍ୟରେ ତିନି ମହଲା ବିଲ୍ଡିଂରୁ ଓହ୍ଲାଇ ଫେରାର ହୋଇଯାଇଥିବା ଜଣା ପଡିଥିଲା।ଏନେଇ ସ୍ବଧାର ଗୃହର ଅଧୀକ୍ଷକ ବିଦ୍ୟୁତପ୍ରଭା ନାୟକ ଗତ ୧ ତାରିଖରେ ଟାଉନ୍ ଥାନାରେ ଅଭିଯୋଗ କରିଥିଲେ । ହେଲେ ନିଖୋଜ ଦୁଇ ଯୁବତୀଙ୍କୁ ଧରିବାରେ ପୁଲିସ୍ ବିଫଳ ହୋଇଥିବାରୁ ପୁଲିସର କଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି ହୋଇଥିଲା। ଫଳରେ ନିଖୋଜ ନାବାଳିକାର ମାଆ ଗତ ୩ ତାରିଖରେ ଝିଅକୁ ଅପହରଣ କରାଯାଇଥିବା ଥାନାରେ ଅଭିଯୋଗ କରିଥିଲେ । ଅଭିଯୋଗକୁ ଭିତ୍ତି କରି ପୁଲିସ୍ ୩୨୮/୧୯ରେ ଏକ ମାମଲା ରୁଜୁ କରି ତଦନ୍ତ ଜାରି ରଖିଥିଲା । ସୂଚନା ମୁତାବକ ଅଭିଯୁକ୍ତମାନେ ଏକ ଏଭେଞ୍ଚର ମୋଟର ସାଇକେଲରେ ରାସଗୋବିନ୍ଦପୁର ଦେଇ ପଶ୍ଚିମବଙ୍ଗକୁ ଏହି ଯୁବତୀମାନଙ୍କୁ ନେଉଥିବା ପୁଲିସ ଖବର ପାଇଥିଲା । ପରେ ଟାଉନ ଥାନା ପୁଲିସ୍ ସେମାନଙ୍କୁ ପିଛା କରି ପଶ୍ଚିମବଙ୍ଗ ଯାଉଥିବା ରାସ୍ତାରେ ଦୁଇ ଯୁବତୀଙ୍କୁ ଉଦ୍ଧାର କରିବା ସହ ଦୁଇ ଅଭିଯୁକ୍ତ ଯୁବକଙ୍କୁ ଗିରଫ କରାଯାଇଥିବା ମୟୁରଭଞ୍ଜ ଜିଲ୍ଲା ଆରକ୍ଷୀ ଅଧିକ୍ଷକ ପରମାର ସ୍ମିଥ ପୁରୁଷୋତ୍ତମ ଦାଶ ସୂଚନା ଦେଇଛନ୍ତି।