ଚୈତ୍ର ମାସରେବି ଶୁଭୁନି ବାରିପଦାରେ ଗୁରୁଗମ୍ଭୀର ଛଉବାଦ୍ୟ

ବାରିପଦା,ନିରପେକ୍ଷ ଖବର: ତା ୧୩/୪  ଚୈତ୍ର ମାସ ଆସିଲେ ଦୁଲୁକି ଉଠେ ମୟୂରଭଞ୍ଜ ମାଟି । ବିଶ୍ୱ ପ୍ରସିଦ୍ଧ ଲୋକନୃତ୍ୟ ଛଉର ତାଳେତାଳେ ବାଦ୍ୟକାର ଏବଂ ନୃତ୍ୟଶିଳ୍ପୀ ମାନେ ସାରା ଚୈତ୍ରମାସ ଆଖଡା ଘରେ ଅଭ୍ୟାସ କରିବା ପରେ ମାସର ଶେଷ ତିନିଦିନ ବାରିପଦା ଛଉପଡିଆରେ ଅନୁଷ୍ଠିତ ହୋଇ ଥାଏ ଛଉନୃତ୍ୟର ବାର୍ଷିକ ଉତ୍ସବ ଚୈତ୍ରପର୍ବ । ରାଜା ରାଜୁଡା ଅମଳରେ ରାଜ ଦରବାରରେ ଏହି ସମରକଳା ଛଉନୃତ୍ୟ ରାଜା ମାନଙ୍କର ପୃଷ୍ଠପୋଷକତାରେ ପ୍ରତିବର୍ଷ ଅନୁଷ୍ଠିତ ହୋଇ ଆସୁଥିଲା । ସ୍ୱାଧିନତା ପରବର୍ତୀ କାଳରେ ଏହି ନୃତ୍ୟ ପ୍ରସାଶନର ତତ୍ୱାବଧାନ କ୍ରମେ ପ୍ରଥମେ କିଛି ବର୍ଷ ବର୍ତମାନ ଆରକ୍ଷୀ ଅଧିକ୍ଷକ ଓ ବିଜୁ ଭବନ ମଝିରେ ଥିବା ପଡିଆରେ ଏବଂ ପରେପରେ ବାରିପଦା ଛଉପଡିଆରେ ପ୍ରତିବର୍ଷ ଅନୁଷ୍ଠିତ ହୋଇ ଆସୁଛି । ଚୈତ୍ରମାସର ଶେଷ ତିନିଦିନ ଚୈତ୍ରପର୍ବ ପାଳନ ହେଉଥିବା ବେଳେ ପ୍ରଥମ ଦିନ ଗ୍ରାମାଂଚଳର ଛଉନୃତ୍ୟଦଳ ଗୁଡିକର ପ୍ରତିଯୋଗୀତା ଅନୁଷ୍ଠିତ ହୋଇଥାଏ । ଏବଂ ଶେଷ ଦୁଇଦିନ ଧରି ବାରିପଦାର ଉତର ସାହି ଓ ଦକ୍ଷିଣ ସାହି ଛଉନୃତ୍ୟ ପ୍ରତିଷ୍ଠାନ ମଧ୍ୟରେ ସାରାରାତି ଛଉନୃତ୍ୟ ଅନୁଷ୍ଠିତ ହୋଇଥାଏ । ବାରିପଦା ଛଉନୃତ୍ୟ ଦେଖିବାକୁ ବେବଳ ବାରିପଦା ବା ମୟୂରଭଞ୍ଜର ନୁହନ୍ତି ପୋଡଶୀ ପଶ୍ଚିମବଙ୍ଗ ଓ ଝାଡଖଣ୍ଡ ଆଦି ରାଜ୍ୟରୁ ମଧ୍ୟ ବହୁ ଦର୍ଶକ ଛୁଟି ଆସିଥାନ୍ତି । ଏହି ବିଶ୍ୱ ପ୍ରସିଦ୍ଧ ଛଉନୃତ୍ୟ ଉପରେ ଗବେଷଣା କରୁଥିବା ଅନେକ ବହିରାଗତ ଗବେଷକ ମଧ୍ୟ ଏହି ଉତ୍ସବରେ ଯୋଗଦେଇ ଏହି ଅନନ୍ୟ ସମରକଳା ସାଂସ୍କୃତିକ ଲୋକନୃତ୍ୟ ଉପରେ ଗୁରୁତ୍ୱପୂର୍ଣ୍ଣ ଗବେଷଣା ମାନ କରିଥାନ୍ତି ।

ଛଉବାଦ୍ୟର ଗୁରୁଗମ୍ଭୀର ଶବ୍ଦ ସାରା ଚୈତ୍ରମାସ ସଂଧ୍ୟାରେ କେବଳ ବାରିପଦା ନୁହେଁ ସାରା ମୟୂରଭଞ୍ଜର ପୁରପଲ୍ଲୀରେ ଶୁଣା ଯାଇଥାଏ । ଚୈତ୍ର ପର୍ବ ତିନିଦିନ ପାଳନ ହେବା ପରେ ବୈଶାଖ ସଂକ୍ରାନ୍ତି ବା ପଣା ସଂକ୍ରାନ୍ତି ଦିନ ଅନୁଷ୍ଠିତ ହୋଇତାଏ ଉଡାପର୍ବ । ବାରିପଦାର କଲେଜ ଛକ ନିକଟରେ ଏହି ଉଡାପର୍ବ ଅନୁଷ୍ଠିତ ହେଉଥିବା ବେଳେ ରାଇରଙ୍ଗପୁର ଗଢ, ଠାକୁରମୁଣ୍ଡା ର ଉଡାପର୍ବ ବେଶ ଧୂମଧାମରେ ପାଳିତ ହୋଇଥାଏ । ପୁରପଲ୍ଲୀରେ ବିଭିନ୍ନ ସ୍ଥାନରେ ମଧ୍ୟ ଉଡାପର୍ବ ପାଳିତ ହୋଇଥାଏ । ଏହି ଉଡାପର୍ବରେ ମାନସିକ ଧାରୀ ଭକ୍ତ ମାନେ ନିଆଁରେ ଚାଲିବା, ଜିଭରେ କଂଟା ଫୋଡିହେବା ଭଳି ଦୁଃସାହସିକ କାର୍ଯ୍ୟମାନ କରିଥାନ୍ତି । ମାନସିକ ଧାରୀ ଭକ୍ତା ମାନେ ନଦୀରୁ ପୁଜାକରି ଘଟ, ବେତ, ପାତାକା ଆଦି ଧାରଣ କରି ଛଉନୃତ୍ୟର ଆରାଧ୍ୟ ଦେବତା ଭୈରବ ଓ ଭୈରବୀ ପୀଠରେ ନାନା ବିଧିମତେ ନିଜର ମାନସିକ ସମ୍ପର୍ଣ୍ଣ କରିଥାନ୍ତି । ଭକ୍ତା ମାନଙ୍କର ଶୋଭାଯାତ୍ରା ନିଶାର୍ଦ୍ଧ ରାତିରେ ଛଉପଡିଆ ମଂଚକୁ ଆସିଥାଏ । ସେଠାରେ ସେମାନେ ନିଜର ସ୍ୱତନ୍ତ୍ର କଳାକୌଶଳ ପ୍ରଦର୍ଶନ କରିଥାନ୍ତି । ମାତ୍ର ଚଳିତ ବର୍ଷ କରୋନା ଭାଇରସ  (କୋଭିଡ -୧୯)ର ସଂକ୍ରମଣ ସମଗ୍ର ବିଶ୍ୱରେ ଆତଙ୍କ ସୃଷ୍ଟି କରିଥିବା ବେଳେ ଏହାର ମୁକାବିଲା କରିବାକୁ ଆମ କେନ୍ଦ୍ର ଏବଂ ରାଜ୍ୟ ସରକାର ଦୃଢତାର ସହ ମୁକାବିଲା କରୁଛନ୍ତି । ଏହି ପରିପ୍ରେକ୍ଷୀରେ  ଚଳିତ ବର୍ଷ ଚୈତ୍ରପର୍ବ ପାଳିତ ହେଉନାହିଁ । ଛଉବାଦ୍ୟର ତାଳେତାଳେ ଆଜିର ଦିନରେ ଦୁଲୁକି ଉଠୁଥିବା ଛଉପଡିଆ ଆଜି ଶୁନଶାନ ଖାଁଖାଁ ଲାଗୁଛି । ଛଉପ୍ରେମୀ ମାନଙ୍କ ମନରେ ବିଷାଦ ଦେଖାଯାଇଥିବା ବେଳେ କରୋନା ଭଳି ଏକ ବିଶ୍ୱ ମହାମାରୀର ମୁକାବିଲା ସର୍ବାଗ୍ରେ ପ୍ରଧାନ୍ୟ ଦିଆଯିବା ଦରକାର ବୋଲି କହିଛନ୍ତି ବାରିପଦାର ଛଉପ୍ରେମୀ ମାନେ ।