ଭୁବନେଶ୍ବର, ନିରପେକ୍ଷ ଖବର:ତା-୭/୫/ ଆବଶ୍ୟକ ହେଲେ ବଢାଯିବ କ୍ବାରେଣ୍ଟାଇନ୍ ସମୟସୀମା । ଏଭଳି ପରାମର୍ଶ ଦେଇଛନ୍ତି ଜାତୀୟ ସ୍ତରୀୟ ସ୍ବାସ୍ଥ୍ୟ ବିଶେଷଜ୍ଞ ତଥା କେନ୍ଦ୍ର ସରକାରଙ୍କ କୋଭିଡ୍-୧୯ ମୁକାବିଲା ପାଇଁ ଗଠିତ କମିଟିର ସଭ୍ୟ ଶ୍ରୀନାଥ ରେଡ୍ଡୀ । କରୋନା ମୁକାବିଲା ନେଇ ଗୁରୁବାର ଶ୍ରୀନାଥ ରେଡ୍ଡୀ ଭିଡିଓ କନଫରେନ୍ସିଂ ଜରିଆରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହିତ ଆଲୋଚନା କରିଛନ୍ତି ।
ଏଥର ସେ କ୍ବାରେଣ୍ଟାଇନ୍ ସମୟସୀମା ବୃଦ୍ଧି କରିବାକୁ ଅଧିକ ଫୋକସ୍ ଦେଇଛନ୍ତି । ଆବଶ୍ୟକ ପଡିଲେ ୧୪ଦିନରୁ ୨୧ଦିନ ପର୍ଯ୍ୟନ୍ତ ପୃଥକବାସରେ ରହିବାକୁ ଗୁରୁତ୍ବ ଦେଇଛନ୍ତି ।
ପୃଥକବାସ ସମୟ ବଢାଯାଇ ପାରେ ବୋଲି ସେ ସୂଚନା ପ୍ରଦାନ କରିଛନ୍ତି । ସାମାଜିକ ଦୂରତା, ପରିଷ୍କାର ପରିଚ୍ଛନ୍ନତା ରକ୍ଷା କରିବା ପାଇଁ ମଧ୍ୟ ସେ ପରାମର୍ଶ ଦେଇଛନ୍ତି ବୋଲି ପରିବହନ ମନ୍ତ୍ରୀ ପଦ୍ମନାଭ ବେହେରା ସୂଚନା ପ୍ରଦାନ କରିଛନ୍ତି ।
ଓଡିଶା ଯେଉଁଭଳି ଭାବରେ କରୋନା ମୁକାବିଲା କରୁଛି ତାହା ପ୍ରଶଂସନୀୟ ବୋଲି ଶ୍ରୀନାଥ ରେଡ୍ଡୀ କହିଛନ୍ତି । ସେ କହିଛନ୍ତି ରାଜ୍ୟ ସରକାର ବହୁତ ଭଲ କାମ କରିଛନ୍ତି । ତେବେ ମାସ୍କ ବ୍ୟବହାର ଓ କଣ୍ଟାକ୍ଟ ଟ୍ରେସିଂ ଉପରେ ମଧ୍ୟ ଗୁରୁତ୍ବ ଦେଇଛନ୍ତି ଶ୍ରୀନାଥ ।
ମୁଖ୍ୟମନ୍ତ୍ରୀଙ୍କ ସହ ଆଲୋଚନା ଅବସରରେ ମୁଖ୍ୟ ଶାସନ ସଚିବଙ୍କ ସହ ସମସ୍ତ ମନ୍ତ୍ରୀ, ସଚିବ, ଜିଲ୍ଲାପାଳ ଉପସ୍ଥିତ ଥିଲେ । ଏହି ଅବସରରେ ଏକ ପ୍ରଶ୍ନୋତ୍ତର କାର୍ଯ୍ୟକ୍ରମ ଚାଲିଥିଲା । ଶ୍ରୀନାଥଙ୍କଠାରୁ କରୋନା ସମ୍ପର୍କିତ ସମସ୍ତ ସୂଚନା ପାଇଥିଲେ ଅଧିକାରୀ ।
