ବାରିପଦା(ନିରପେକ୍ଷ ଖବର)ତା-୩୦/୦୫-କରୋନା ସଂକ୍ରମଣ ପ୍ରତିହତ କରିବା ପାଇଁ ଯୋଦ୍ଧା ମାନେ ନିରନ୍ତର ପ୍ରୟାସ ଜାରି ରଖିଛନ୍ତି।
କୋଭିଡ୍ ଯୁଦ୍ଧରେ ନିଜର ସୁଖ ସ୍ଵାଛନ୍ଦ୍ୟକୁ ତ୍ୟାଗ କରି ସଂକ୍ରମଣକୁ ରୋକିବା ପାଇଁ ଦିନରାତି ଏକ କରିଦେଇଥିବା କୋଭିଡ୍ ଯୋଦ୍ଧାମାନଙ୍କ ତ୍ୟାଗକୁ ସମ୍ମାନ ଜଣାଇବା ଏବଂ ସେମାନଙ୍କ ମହତ୍ କାର୍ଯ୍ୟକୁ ଉତ୍ସାହିତ କରିବା ପାଇଁ ଶନିବାର ସନ୍ଧ୍ୟା ସାଢ଼େ ୫ଟାରେ ଦେଶବିଦେଶର ସବୁ ଓଡ଼ିଆଙ୍କୁ ରାଜ୍ୟ ସଙ୍ଗୀତ ବନ୍ଦେ ଉତ୍କଳ ଜନନୀ ଗାନ କରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅନୁରୋଧ କରିଥିଲେ।ଯେଉଁଠାରେ ବି ଓଡ଼ିଆ ଥାଆନ୍ତୁ ସେହି ସ୍ଥାନରେ ଠିଆ ହୋଇ ବନ୍ଦେ ଉତ୍କଳ ଜନନୀ ଗାନ କରିବାକୁ ମୁଖ୍ୟମନ୍ତ୍ରୀ ଅନୁରୋଧ କରିଛନ୍ତି।
ଏହି ସମୟରେ ସମସ୍ତ ଟ୍ରାଫିକ ବନ୍ଦ ରଖିବା ସହିତ ସମସ୍ତ ସରକାରୀ ବେସରକାରୀ କାର୍ଯ୍ୟାଳୟ ଘର ବଜାର ଯେଉଁଠାରେ ବି ଥାଆନ୍ତୁ ନା କାହିଁକି ସମସ୍ତେ ନିଜ ନିଜ ସ୍ଥାନରେ ଠିଆ ହୋଇ ବନ୍ଦେ ଉତ୍କଳ ଜନନୀ ଗାନ କରି କୋଭିଡ୍ ଯୋଦ୍ଧାଙ୍କୁ ଉତ୍ସାହିତ ଓ ସମ୍ମାନିତ କରିବା ପାଇଁ ମୁଖ୍ୟମନ୍ତ୍ରୀ ସମସ୍ତଙ୍କୁ ଅନୁରୋଧ କରିଥିଲେ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପ୍ରସ୍ତାବ କ୍ରମେ ମୟୂରଭଞ୍ଜ ଜିଲ୍ଲାର ପ୍ରତିଟି ସ୍ଥାନରେ ଏହା ଗାନ କରାଯାଇଛି।
ମୟୂରଭଞ୍ଜ ଜିଲ୍ଲାପାଳ କାର୍ଯ୍ୟାଳୟରେ ଜିଲ୍ଲାପାଳ ବିନୀତ ଭରଦ୍ୱାଜ ଓ ଅତିରିକ୍ତ ଜିଲ୍ଲାପାଳ ସହ ସମସ୍ତ କର୍ମକର୍ତ୍ତା ସାମୁହିକ ଭାବେ ସଙ୍ଗୀତ ଗାନ କରିଥିଲେ। ଏଥି ସହିତ ଜିଲ୍ଲା ଆରକ୍ଷୀ ଅଧୀକ୍ଷକ ପରମାର ସ୍ମିଥ ପୁରୁଷୋତ୍ତମ ଦାସ ଟାଉନ ଥାନା ସମ୍ମୁଖରେ ଉପସ୍ଥିତ ରହି ରାଜ୍ୟ ସଙ୍ଗୀତ ଗାନ କରି କରୋନା ଯୋଧ୍ୟାଙ୍କୁ 
ସମ୍ମାନିତ କରିଛନ୍ତି।ସେହିପରି ବିଜୁ ଭବନ ଠାରେ ମାନ୍ୟବର ରାଜସ୍ୱ ଓ ବିପର୍ଯ୍ୟୟ ପ୍ରଶମନ ମନ୍ତ୍ରୀ ସୁଦାମ ମାରାଣ୍ଡି, ପୂର୍ବତନ ଉପବାଚସ୍ପତି ସାନନ୍ଦ ମାରାଣ୍ଡି, ରାଜ୍ୟ କୃଷି ଶିଳ୍ପ ନିଗମ ଅଧ୍ୟକ୍ଷ ଦେବାଶିଷ ମହାନ୍ତି ସହ ସମସ୍ତ ବିଜୁ ଜନତା ଦଳର କର୍ମକର୍ତ୍ତା ସହ
ସାଧାରଣ ଜନତା ଉପସ୍ଥିତ ରହି ସାମାଜିକ ଦୂରତ୍ୱ ରକ୍ଷାକରି ବନ୍ଦେ ଉତ୍କଳ ଜନନୀ ଏକ ସ୍ୱରରେ ଗାନ କରିଛନ୍ତି।ସେହିପରି ମୟୁରଭଞ୍ଜ ସଦର ବିଜେଡି ପକ୍ଷରୁ ରାଇରଙ୍ଗପୁର ଦୁର୍ଗାମଣ୍ଡପ ସ୍ଥିତ ବିଜୁ ପଟ୍ଟନାୟକ ପ୍ରତିମୂର୍ତ୍ତି ନିକଟରେ ସମୂହ ଭାବେ ବନ୍ଦେ ଉତ୍କଳ ଜନନୀ ସଙ୍ଗୀତ ଗାନ କରିଥିଲେ।
ଏଥିରେ ରାଜ୍ୟସଭା ସାଂସଦ ମମତା ମହାନ୍ତ,ଜିଲ୍ଲା ସଦର ସଭାପତି କାଶୀନାଥ ହେମ୍ବ୍ରମ,ଡ଼ଃ ଦେବାଶିଷ ମାରାଣ୍ଡି,ପ୍ରକାଶ ମହାନ୍ତି,ସୁବ୍ରତ ଛାଟୋଇ,ଗଣେଶ ମିଶ୍ର ପ୍ରମୁଖ ଉପସ୍ଥିତ ଥିଲେ।ସେହିପରି ମୋରୋଡା ବିଧାୟକ ରାଜକିଶୋର ଦାସ ନିର୍ବାଚନ ମଣ୍ଡଳୀ ଅନ୍ତର୍ଗତ ଚଢେଇ ଗାଁ ଠାରେ ସ୍ଥାନୀୟ 
ଲୋକମାନଙ୍କ ସହିତ ସାମୁହିକ ଭାବେ ସଙ୍ଗୀତ ଗାନ କରିଥିଲେ।ବନ୍ଦେ ଉତ୍କଳ ଜନନୀ ସୁମଧୁର ସଙ୍ଗୀତ ଗାନରେ ସହର ସମେତ ସାରା ଜିଲ୍ଲା ପ୍ରକମ୍ପିତ ହୋଇଥିଲା।
