ପିଆରଏମ୍ ମେଡିକାଲ କଲେଜ ଆଣ୍ଡ ହସ୍ପିଟାଲରେ ସଫେଇ କର୍ମଚାରମାନଙ୍କ ପୁଣି କାର୍ଯ୍ୟବନ୍ଦ ଆନ୍ଦୋଳନ..

ବାରିପଦା,ନିରପେକ୍ଷ ଖବର:: ପିଆରଏମ୍ ମେଡିକାଲ କଲେଜ ଆଣ୍ଡ ହସ୍ପିଟାଲରେ ସଫେଇ କର୍ମଚାରୀମାନଙ୍କୁ ଉପଯୁକ୍ତ ଦରମା ଦିଆଯାଉନଥିବା ଅଭିଯୋଗ କରି ମେଡିକାଲ ପରିସରରେ ସଫେଇ କରୁଥିବା କର୍ମଚାରୀମାନେ ପୁଣି କାର୍ଯ୍ୟବନ୍ଦ ଆନ୍ଦୋଳନର
ଡାକରା ଦେଇଛନ୍ତି । ସଫେଇ କର୍ମଚାରୀଙ୍କ କାର୍ଯ୍ୟବନ୍ଦ ଆନ୍ଦୋଳନ ଯୋଗୁଁ ଗୁରୁବାର ମେଡ଼ିକାଲ ପରିସରରେ ପୂତିଗନ୍ଧମୟ ପରିବେଶ ସୃଷ୍ଟି ହୋଇଛି । ହସ୍ପିଟାଲରେ ବିଭିନ୍ନ ଅଳିଆ ଆବର୍ଜନା ଭରି ହୋଇଯାଇଛି । ଫଳରେ ରୋଗୀମାନେ ନାହି ଥିବା ଅସୁବିଧାରେ ସମ୍ମୁଖିନ ହେଉଥିବା ଦେଖିବାକୁ ମିଳିଛି । ମେଡିକାଲ ପରିସରକୁ ସଫାସୁତୁରା ରଖିବା ପାଇଁ ଠିକା ନେଇଥିବା ସଂସ୍ଥା ଏହି ସଫେଇ କର୍ମଚାରୀମାନଙ୍କୁ ଠିକ୍ ସମୟରେ ଏବଂ ପରିଶ୍ରମ ଅନୁସାରେ ଦରମା ଦେଉ ନଥିବା ଅଭିଯୋଗ କରିଛନ୍ତି । ଯେ ପର୍ଯ୍ୟନ୍ତ ସଫେଇ କର୍ମଚାରୀମାନଙ୍କୁ ଠିକ୍ ସମୟରେ ଦରମା ଦିଆନଯାଇଛି ସେ ପର୍ଯ୍ୟନ୍ତ ଏହି କାର୍ଯ୍ୟବନ୍ଦ ଆନ୍ଦୋଳନ ଜାରି ରହିବ ବୋଲି ସଫେଇ କର୍ମଚାରୀମାନେ ଚେତାବନୀ ଦେଇଛନ୍ତି । ସୂଚନା ମୁତାବକ, ହସ୍ପିଟାଲ ପରିସରକୁ ସଫାସୁତୁରା ରଖିବା ପାଇଁ ଚଳିତ ବର୍ଷ ସୁମିତ ସିକ୍ୟୁରିଟି ସଂସ୍ଥା ଟେଣ୍ଡର ନେଇଛି। ହସିଟାଲରେ ପୂର୍ବରୁ କାମ କରୁଥିବା ସଫେଇ କର୍ମଚାରୀମାନଙ୍କୁ ଉକ୍ତ ସଂସ୍ଥା ସେମାନଙ୍କୁ ପୁଣି ନିଯୁକ୍ତି ଦେଇଥିଲା । ମାତ୍ର ନିଯୁକ୍ତି ଦେବା ସମୟରେ ଏହି ସଂସ୍ଥା ସଫେଇ କର୍ମଚାରୀମାନଙ୍କ ସହିତ ଏକ ଚୁକ୍ତିନାମା କରିଥିଲେ । ଚୁକ୍ତିନାମା ଅନୁସାରେ ହସ୍ପିଟାଲରେ ପୂର୍ବରୁ କାମ କରୁଥିବା କର୍ମଚାରୀଙ୍କୁ ନିଯୁକ୍ତି ଦେବା ସହିତ ହସ୍ପିଟାଲରେ ନୂଆ ଝାଡୁଦାର ନିଯୁକ୍ତି କଲେ ପୂର୍ବରୁ କାମ କରୁଥିବା କର୍ମଚାରୀଙ୍କ ଠାରୁ ଅନୁମତି ନିଆଯିବାର ସର୍ଭ ରହିଥିଲା । ଏହା ସହିତ ମାସରେ ୪ଟି ଛୁଟି ଦିଆଯିବା ସହ ଏହି ଛୁଟି ସମୟରେ ଦରମା କଟାଯିବ ନାହିଁ ବୋଲି ଠିକା ସଂସ୍ଥା କହିଥିଲା । ହେଲେ ସଂସ୍ଥା ଏହି ସର୍ତ୍ତ ସର୍ତ୍ତାବଳୀ ପାଳନ କରୁ ନଥିବା ସଫେଇ-କର୍ମଚାରୀମାନେ ଅଭିଯୋଗ ଆଣିଛନ୍ତି । ଏହା ସହିତ ଶ୍ରମିକ ନିୟମ ଅନୁସାରେ ଦରମା ଦିଆଯିବା ସହ ଝାଡୁଦାରମାନଙ୍କର କୌଣସି ଅସୁବିଧା ହେଲେ ଛୁଟି ପ୍ରଦାନ କରାଯିବ ବୋଲି କହିଥିଲେ ମାତ୍ର ସୁମିତ ସିକ୍ୟୁରିଟି ସଂସ୍ଥା ଉପରୋକ୍ତ ମୁତାବକ ଏହି ସଫେଇ କର୍ମଚାରୀମାନଙ୍କୁ ବିଭିନ୍ନ ସୁବିଧା ସୁଯୋଗରୁ ବଞ୍ଚିତ କରି ରଖିଥିବା ସେମାନେ କହିଛନ୍ତି । ଏନେଇ ଗତ ମଇ ମାସ ୧୬ ତାରିଖରେ ମେଡିକାଲରେ ସଫେଇ କର୍ମଚାରୀମାନେ କାର୍ଯ୍ୟବନ୍ଦ ଆନ୍ଦୋଳନ କରିଥିଲେ। ସେତେବେଳେ ଠିକା ନେଇଥିବା ସଂସ୍ଥା ଉପଯୁକ୍ତ ଦରମା ଠିକ୍ ସମୟରେ ଦେବ ବୋଲି କହିଥିଲା । ମାତ୍ର ଏକ ମାସ ବିତିଯିବା ପରେ ପୁଣି ଉକ୍ତ ଠିକା ସଂସ୍ଥା ନିଜ ପ୍ରତିଶ୍ରୁତିରୁ ଓହରି ଯାଇ ସଫେଇ କର୍ମଚାରୀମାନଙ୍କୁ ହଇରାଣ କରିବାକୁ ଯୋଜନା କରୁଥିବାରୁ ଏହି କାର୍ଯ୍ୟବନ୍ଦ ଆନ୍ଦୋଳନ ଜାରି ରହିବ ବୋଲି ସଫେଇ କର୍ମଚାରୀ ଚେତାବନୀ ଦେଇଛନ୍ତି ।