ବାରିପଦା(ନିରପେକ୍ଷ ଖବର)ତା-୦୫/୦୭-ନଦୀବନ୍ଧରେ ଗାଧୋଇବା ବେଳେ ପାଣିରେ ବୁଡି ଯୁବକଙ୍କ ମୃତ୍ୟୁ ଘଟିଛି।ଏହି ଭଳି ଅଭାବନୀୟ ଘଟଣା ଘଟିଯାଇଛି ମୟୁରଭଞ୍ଜ ଜିଲ୍ଲା ଅନ୍ତର୍ଗତ ଖୁଣ୍ଟା ବ୍ଲକର ଡୁକୁରା ଗ୍ରାମରେ।ରବିବାର ମଧ୍ୟାହ୍ନ ସମୟରେ ଘର ନିକଟରେ ଥିବା ଏକ ନଦୀବନ୍ଧରେ ଗାଧୋଇବା ପାଇଁ ଯାଇଥିଲେ।ସେଠାରେ ଗାଧୋଇବା ସମୟରେ ପାଣିରେ ବୁଡି ମୃତ୍ୟୁ ବରଣ କରିଛନ୍ତି ।
ଏହା ଘଟଣା ବାବଦରେ ଜାଣିବା ପରେ ତାଙ୍କ ପରିବାର ସମେତ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳି ଯାଇଛି।ମୃତ୍ୟୁ ବରଣ କରିଥିବା ଯୁବକ ଜଣକ ହେଲେ ଡୁକୁରା ଗ୍ରାମର ଅଶୋକ ବ୍ରହ୍ମଙ୍କ ପୁଅ ସୁଭମ କୁମାର ବ୍ରହ୍ମ (୧୯)।ସେ ବାରିପଦା ସ୍ଥିତ ମହାରାଜା ପୂର୍ଣଚନ୍ଦ୍ର ସୟଂଶାସିତ ମହାବିଦ୍ୟାଳୟର ଯୁକ୍ତ ୩ ବିଜ୍ଞାନ ବିଭାଗର ଛାତ୍ର ଥିଲେ । ଆଜି ମଧ୍ୟାହ୍ନରେ ଅନ୍ୟ ତିନି ଜଣ ସାଙ୍ଗ ମାନଙ୍କ ସହିତ ନିକଟସ୍ଥ ଅରିକୂଳ ବନ୍ଧକୁ ଗାଧୋଇବା ପାଇଁ ଯାଇଥିଲେ କିନ୍ତୁ ଗାଧୋଇବା ସମୟରେ ପାଣିରେ ନିଖୋଜ ହୋଇଯାଇଥିଲେ ।ଏହା ଦେଖି ଅନ୍ୟ ସାଙ୍ଗମାନେ ଖୋଜାଖୋଜି କରିଥିଲେ ମଧ୍ୟ ପାଇ ନଥିଲେ । ଏହି ଘଟଣା ଜଣା ପଡିବା ପରେ ସ୍ଥାନୀୟ ଲୋକେ ବନ୍ଧ କଡ଼ରେ ପହଁଚିଥିବା ବେଳେ ଲକ୍ଷ୍ମଣାସାହି ପଞ୍ଚାୟତର ଯୁବ ସରପଞ୍ଚ ଶିବ ସିଂ ସାହସିକତାର ସହିତ ପାଣିରେ ବୁଡି ସୁଭମଙ୍କୁ ଠାବ କରିଥିଲେ । ସଙ୍ଗେ ସଙ୍ଗେ ଗୁରୁତର ଅବସ୍ଥାରେ ସୁଭମକୁ ଡୁକୁରା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତି କରିଥିଲେ।କିନ୍ତୁ ସେଠାରେ ଡାକ୍ତର ସୁଭମକୁ ମୃତ ଘୋଷଣା କରିଥିଲେ । ଏନେଇ ଖୁଣ୍ଟା ଥାନାରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି
