ଓଡ଼ିଆ ଭାଷା-ସାହିତ୍ୟକୁ କାନ୍ତକବିଙ୍କ ଅବଦାନ ଅବିସ୍ମରଣୀୟ

ଭୁବନେଶ୍ୱର,ନିରପେକ୍ଷ ଖବର ୦୯/୧୨:ପୂଜ୍ୟପୂଜା ସଂସ୍କୃତି ସୁରକ୍ଷା ଅଭିଯାନ ପକ୍ଷରୁ ଓଡ଼ିଆ ସାହିତ୍ୟର ବରେଣ୍ୟ ସାଧକ ଔପନ୍ୟାସିକ କବି, ନାଟ୍ୟକାର, ବ୍ୟଙ୍ଗକାର କାନ୍ତକବି ଲକ୍ଷ୍ମୀକାନ୍ତ ମହାପାତ୍ରଙ୍କ ୧୩୩ ତମ ଜୟନ୍ତୀ ପାଳିତ ହୋଇଯାଇଛି। ମୁଖ୍ୟ ମହାଡାକପାଳ କାର୍ଯ୍ୟାଳୟ ସମ୍ମୁଖରେ ଅନୁଷ୍ଠିତ କାର୍ଯ୍ୟକ୍ରମରେ ସାମ୍ବାଦିକ ଶୋଭାଗ୍ୟ ମହାନ୍ତି ସମ୍ମାନିତ ହୋଇଛନ୍ତି। କାନ୍ତକବି ସ୍ବର୍ଗତ ମହାପାତ୍ରଙ୍କ ସ୍ମୃତିସଭାରେ ପୂଜ୍ୟପୂଜା ସଂସ୍କୃତି ସୁରକ୍ଷା ଅଭିଯାନର ଅଧ୍ୟକ୍ଷ, ବରିଷ୍ଠ ସାମ୍ବାଦିକ ପ୍ରଦ୍ୟୁମ୍ନ ଶତପଥୀ ସଭାପତିତ୍ୱ କରିଥିବା ବେଳେ ମୁଖ୍ୟ ଅତିଥି ଭାବେ ଅଭିଯାନର ବରିଷ୍ଠ ସଦସ୍ୟ, ସ୍ୱାଧୀନତା ସଂଗ୍ରାମୀ ପର୍ଶୁରାମ ଦ୍ୱିବେଦୀ ଯୋଗ ଦେଇଥିଲେ। ଏଥିରେ ସୀତାବଲ୍ଲଭ ମହାପାତ୍ର ଅତିଥି ଭାବେ ଉପସ୍ଥିତ ଥିଲେ। ଏହି ଅବସରରେ ଓଡ଼ିଆ ଭାଷା, ସାହିତ୍ୟ, ସଂସ୍କୃତି ଓ ସାମ୍ବାଦିକତା ପାଇଁ ସୌଭାଗ୍ୟ ରଂଜନ ମହାନ୍ତିଙ୍କୁ କାନ୍ତକବି ଲକ୍ଷ୍ମୀକାନ୍ତ ମହାପାତ୍ର ସ୍ମୃତିସମ୍ମାନ, ବିଶିଷ୍ଟ ଭାଷାଯୋଦ୍ଧା, ସାହିତ୍ୟିକ ତଥା କାନ୍ତକବି ଓଡ଼ିଶା ମଂଚର ଆବାହକ ଲକ୍ଷ୍ମୀଧର ବିଶ୍ୱାଳଙ୍କୁ ପୂଜ୍ୟପୂଜା ପାଇଁ କାନ୍ତକବି ସମ୍ମାନ ଓ ସୁକବି, ଲେଖକ ନିରାକାର ଦାସଙ୍କୁ କାନ୍ତକବି ଲକ୍ଷ୍ମୀକାନ୍ତ ମହାପାତ୍ର ୨୦୨୦ ସମ୍ମାନରେ ସମ୍ମାନିତ ହୋଇଥିଲେ। ଏହି କାର୍ଯ୍ୟକ୍ରମରେ ଅଭିଯାନର ସଂଯୋଜକ ନାରାୟଣ ଚନ୍ଦ୍ର ଓଝାଙ୍କ ସମେତ ପ୍ରଦୀପ ବିଶ୍ୱାଳ, ବ୍ରଜବନ୍ଧୁ ପରିଡ଼ା, ପ୍ରମୋଦ କୁମାର ଦେବ,ରୋହିତ ନାୟକ, ଲକ୍ଷ୍ମୀଧର ବେହେରା, ପ୍ରକାଶ ମଲ୍ଲିକ,ଲକ୍ଷ୍ମୀଧର ବିଶ୍ୱାଳ, ସୁମନ୍ତ ସ୍ୱାଇଁ,ଲକ୍ଷ୍ମଣ ଦାସ, ଲଗ୍ନାଦୀପା ମିଶ୍ର,ସମିତା ମହାରଣା, ସିତାଂଶୁ ଶେଖର ମହାରଣା, ବି. ମୂରଲୀଧର, ଡ. ଅସିତ୍ ଦାସ, ମନଜିତ୍ କୌର, ନଗେନ୍ ନାୟକ ପ୍ରମୁଖ ଉପସ୍ଥିତ ଥିଲେ। ସ୍ବର୍ଗତ ମହାପାତ୍ରଙ୍କ କାଳଜୟୀ ଲେଖା “ବନ୍ଦେ ଉତ୍କଳ ଜନନୀ”କୁ ରାଜ୍ୟ ସଂଗୀତ ଭାବେ ମାନ୍ୟତା ମିଳିବା ସହିତ ଏହା ପ୍ରତିଟି ସ୍ୱାଭିମାନୀ ଓଡ଼ିଆଙ୍କ ମନ ଓ ହୃଦୟରେ ଏକ ସ୍ୱତନ୍ତ୍ର ସ୍ଥାନ ଅଧିକାର କରିଛି । ରାଜ୍ୟ ସରକାର କାନ୍ତକବିଙ୍କ ‘ବନ୍ଦେ ଉତ୍କଳ ଜନନୀ’ ଲେଖାକୁ ରାଜ୍ୟ ସଂଗୀତର ମାନ୍ୟତା ଦେଇଥିବାରୁ ପୂଜ୍ୟପୂଜା ସଂସ୍କୃତି ସୁରକ୍ଷା ଅଭିଯାନ ପକ୍ଷରୁ ଧନ୍ୟବାଦ ଅର୍ପଣ କରାଯାଇଥିଲା । ଓଡ଼ିଆ ଭାଷା-ସାହିତ୍ୟ, ନାଟ୍ୟ, ଗଳ୍ପ, ପ୍ରବନ୍ଧ ପ୍ରମୁଖ ରଚନା କରିବା ସହିତ ସମାଜ ସଂସ୍କାର ଉପରେ ତାଙ୍କର ଲେଖନୀର ଗଭୀର ପ୍ରଭାବ ପକାଇପାରିଥିଲା । କଣା ମାମୁଁ,ପାନ ମହାତ୍ମ୍ୟ, ଜୀବନ ସଂଗୀତ ପ୍ରମୁଖ ତାଙ୍କର କାଳଜୟୀ କୃତୀ ଆଦି ତାଙ୍କର ଅବଦାନ ବୋଲି ଅତିଥିମାନେ ମତବ୍ୟକ୍ତ କରିଥିଲେ।