ଭୁବନେଶ୍ୱର ,ନିରପେକ୍ଷ ଖବର(୪-୧୧-୨୦୧୯) : ରେଡ୍ ସ୍ୱସ୍ତିକ ସୋସାଇଟି ଏକ ସ୍ୱୀକୃତିପ୍ରାପ୍ତ ବେସରକାରୀ ସ୍ୱେଚ୍ଛାସେବୀ ଅନୁଷ୍ଠାନ, ଦୀର୍ଘ ୧୮ ବର୍ଷ ଧରି ନିରବଚ୍ଛିନ୍ନ ଭାବେ ସ୍ୱାସ୍ଥ୍ୟସେବା କ୍ଷେତ୍ରରେ କାମ କରିଆସୁଅଛି । ଜାତି-ଧର୍ମ-ବର୍ଣ୍ଣ ନିର୍ବିଶେଷରେ ଭିନ୍ନକ୍ଷମ ବ୍ୟକ୍ତିବିଶେଷଙ୍କୁ ସାହାଯ୍ୟ କରିବା ପରି ମହତ୍ ଉଦ୍ଦେଶ୍ୟ ନେଇ ସ୍ଥାନୀୟ ଜୟଦେବ ଭବନଠାରେ ଏକ ସାଂସ୍କୃତିକ କାର୍ଯ୍ୟକ୍ରମ ସହ ପାଣ୍ଠି ସଂଗ୍ରହ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଅଛି 
ଅନୁଷ୍ଠାନର ସଭାପତି ବିଜୟ ଆଚାର୍ଯ୍ୟଙ୍କ ସଭାପତିତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଶ୍ରୀଧର ପାତ୍ର-ନିର୍ଦ୍ଦେଶକ (ଅର୍ଥ ବିଭାଗ, ନାଲ୍କୋ), ଚାଟାର୍ଡ଼ ରାଜୀବ ସାହୁ, ଲଳିତ ଦାସ (ଭାରତୀୟ ପୋଲିସ୍ ସେବା), ରାମ ପ୍ରସାଦ ପାତ୍ର-ସଭାପତି (ଲାୟନ୍ କ୍ଲବ୍, ଭୁବନେଶ୍ୱର), ବିଷ୍ଣୁ ପ୍ରସାଦ ମିଶ୍ର-ଉପନିର୍ଦ୍ଦେଶକ (ଜିନ୍ଦଲ୍ ଷ୍ଟିଲ୍ ଆଣ୍ଡ ପାୱାର), ଡଃ ନିମାଇଁ ଚରଣ ପରିଜା-ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିମ୍ପ୍ଲି କେୟାର ହସ୍ପିଟାଲ୍), ଡଃ ସ୍ମରଜିତ୍ ପଟ୍ଟନାୟକ-ଚିକିତ୍ସାଳୟ ଉପଦେଷ୍ଟା (ସିମ୍ପ୍ଲି କେୟାର ହସ୍ପିଟାଲ୍), ସୁଚିସ୍ମିତା ପୃଷ୍ଟି-ନିର୍ଦ୍ଦେଶିକା (ମୀନତି ବେହେରା କର୍କଟ ଅନୁଷ୍ଠାନ) ସହ ବହୁ ମାନ୍ୟଗଣ୍ୟ ଅତିଥିମାନେ ଯୋଗଦେଇ ଅନୁଷ୍ଠାନର କାର୍ଯ୍ୟକ୍ରମକୁ ସାଧୁବାଦ୍ ଜଣାଇଥିଲେ । ଏହି କାର୍ଯ୍ୟକ୍ରମରେ ସିଲ୍ଭର୍ ଏଜ୍ ଫାଉଣ୍ଡେସନ୍ସର ବୟୋଜ୍ୟେଷ୍ଠ ସଦସ୍ୟମାନେ ମଧ୍ୟ ଯୋଗ ଦେଇଥିଲେ । କାର୍ଯ୍ୟକ୍ରମ ପରିଶେଷରେ ବିଭିନ୍ନ କଣ୍ଠଶିଳ୍ପୀଙ୍କ ଦ୍ୱାରା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା । ଏହି କାର୍ଯ୍ୟକ୍ରମକୁ ଅନୁଷ୍ଠାନର ସମ୍ପାଦକ ତଥା କୋଷାଧ୍ୟକ୍ଷ ଶ୍ରୀଯୁକ୍ତ ଦେବାଶିଷ ପଟ୍ଟନାୟକ ପରିଚାଳନା କରିଥିଲେ ।
