ବାରିପଦା(ନିରପେକ୍ଷ ଖବର)ତା-୧୫/୦୬-ଆଧୁନିକ ସମାଜରେ ଏବେ ମଧ୍ୟ ଅନେକ କୁସଂସ୍କାର ବଞ୍ଚିରହିଛି। ଏହାଯୋଗୁ ବେଳେବେଳେ ମୂଲ୍ୟବାନ ଜୀବନ ଚାଲିଯାଉଛି।ଏହାର ଏକ ସଦ୍ୟତମ ଉଦାହରଣ ଦେଖିବାକୁ ମିଳିଛି ମୟୁରଭଞ୍ଜ ଜିଲ୍ଲାରେ।ଜିଲ୍ଲାର ଖୁଣ୍ଟା ଥାନା ଅନ୍ତର୍ଗତ କରକଚିଆ ଗ୍ରାମରେ ଡାହାଣୀ ସନ୍ଦେହରେ ଏହି ଭଳି ସମ୍ବେଦନଶୀଳ ତଥା ଲୋମହର୍ଷଣକାରୀ ଘଟଣାଟି ଘଟିଛି ।
ଡାହାଣୀ ସନ୍ଦେହରେ ମହିଳାଙ୍କୁ ଟାଙ୍ଗିଆରେ ହତ୍ୟାକରି ଯୁବକ ଜଣକ କଟା ମୁଣ୍ଡ ଧରି ଥାନାରେ ଆତ୍ମସମର୍ପଣ କଲେ।ମୃତ ମହିଳା ଜଣଙ୍କ ସେହି ଗ୍ରାମର ୫୫ ବର୍ଷୀୟା ଚମ୍ପା ସିଂ ଓ ଅଭିଯୁକ୍ତ ଜଣକ ହେଲେ ୨୮ ବର୍ଷୀୟ ବୂଧିରାମ ସିଂ।ସୂଚନା ଅନୁଯାୟୀ ବୂଧିରାମ ସିଂଙ୍କ ର ୪ ବର୍ଷର ଝିଅ ଅସୁସ୍ଥତା କାରଣରୁ କିଛି ଦିନ ପୂର୍ବେ ମୃତ୍ୟୁବରଣ କରିଥିଲା।ବୁଧିରାମ ତାଙ୍କ ଝିଅର ମୃତ୍ୟର କାରଣ ସେହି ଗ୍ରାମର ଚମ୍ପା ସିଂର ଗୁଣି ଗାରେଡିରେ ହୋଇଥିବା ସନ୍ଦେହ କରିଥିଲେ।ତେଣୁ ତାର ପ୍ରତିଶୋଧ ନେବା ପାଇଁ ଅଭିଯୁକ୍ତ ବୁଧରାମ ଆଜି ଦିନ ପ୍ରାୟ ୧୧ ଟା ସମୟରେ କରକଚିଆ ଗ୍ରାମର ନୂଆସାହି ଛକ ନିକଟରେ ଚମ୍ପାଙ୍କୁ ଏକ ଟାଙ୍ଗିଆ ଦ୍ୱାରା ମୁଣ୍ଡ ଗଣ୍ଡି କୁ ଅଲଗା କରି ହତ୍ୟା କରିଥିଲା । ପରେ କଟା ମୁଣ୍ଡ ଓ ଟାଙ୍ଗିଆ ଧରି ଚାଲି ଚାଲି ପୁଲିସ ନିକଟରେ ସର୍ମପଣ କରିବାକୁ ଆସୁଥିବା ବେଳେ ଖବର ପାଇ ପୁଲିସ ରାସ୍ତାରୁ ଅଭିଯୁକ୍ତକୁ ଗିରଫ କରି ଥାନାକୁ ଆଣିଛି। ପରେ ସାଇଣ୍ଟିଫିକ୍ ଟିମର ସହାୟତାରେ ତଦନ୍ତ ଅବ୍ୟାହତ ରଖିଛି|
ଏଥିନେଇ ଥାନାରେ କେସ ନଂ ୯୬ / ୨୦ରେ ଏକ ମାମଲା ରୁଜୁ କରିଛି ପୁଲିସ ।ପୂର୍ବରୁ ମଧ୍ୟ ଏହିଭଳି ଅନେକ ଘଟଣା ଜିଲ୍ଲାରେ ଦେଖିବାକୁ ମିଳିଥିବା ବେଳେ ଏହି ଘଟଣା ପୁନଶ୍ଚ ସ୍ଥାନୀୟ ଅଞ୍ଚଳର ଲୋକଙ୍କ ମନରେ ଭୟର ବାତାବରଣ ସୃଷ୍ଟି କରିଛି। ଖୁଣ୍ଟା ଥାନା ପୋଲିସ ଘଟଣା ସ୍ଥଳକୁ ଯାଇ ଅଧିକ ତଦନ୍ତ ଜାରି ରଖିଛି। ତେବେ ଆଜିର ଆଧୁନିକ ସମାଜରେ ଡାହାଣୀ ଭଳି ଅନ୍ଧବିଶ୍ୱାସର ଅନ୍ଧାର ଭିତରେ ରହିଥିବା ଲୋକମାନଙ୍କ ମଧ୍ୟରେ କେବେ ସୁଧାର ଆସିବ ତାହା ଏବେ ବଡ଼ ପ୍ରଶ୍ନବାଚୀ ସୃଷ୍ଟି କରୁଛି?
