ବାତ୍ୟାରେ କ୍ଷତି ହୋଇଥିବା ସମସ୍ତ ଉଠାଦୋକାନୀ, କୁକୁଡ଼ା ଓ ନଡ଼ିଆ ଚାଷୀଙ୍କ ପାଇଁ ମୁଖ୍ୟମନ୍ତ୍ରୀ ଘୋଷଣା କଲେ ସ୍ୱତନ୍ତ୍ର ପ୍ୟାକେଜ…

ଭୁବନେଶ୍ୱର:ନିରପେକ୍ଷ ଖବର: ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଫନି ବାତ୍ୟାରେ କ୍ଷତିଗ୍ରସ୍ତ ହୋଇଥିବା ସମସ୍ତ ଉଠାଦୋକାନୀ, କୁକୁଡ଼ା ଚାଷୀ ଓ ନଡ଼ିଆ ଚାଷୀ ମାନଙ୍କ ପାଇଁ ବାତ୍ୟା ପରବର୍ତ୍ତୀ ସ୍ୱତନ୍ତ୍ର ପ୍ୟାକେଜ ଘୋଷଣା କଲେ।ଏହି ପ୍ୟାକେଜ ଦ୍ୱାରା ଚାଷୀ ଓ ଉଠାଦୋକାନୀ ମାନେ ଆର୍ଥିକ ସହାୟତା ପାଇପାରିବେ ।ସହରାଞ୍ଚଳର ଉଠାଦୋକାନୀ ଅଧିକ କ୍ଷତିଗ୍ରସ୍ତ ହୋଇଥିବା ଯୋଗୁଁ ସେମାନଙ୍କ ପୁନରୁଦ୍ଧାର ଲାଗି ମୁଖ୍ୟମନ୍ତ୍ରୀ ଆର୍ଥିକ ସହାୟତାର ଏହି ପ୍ୟାକେଜ ଘୋଷଣା କରିଛନ୍ତି । ବାତ୍ୟାରେ ପ୍ରଭାବିତ ହୋଇଥିବା ୧୧ଟି ସହରର ପ୍ରାୟ ୩୦ ହଜାର ଉଠାଦୋକାନୀ ମାନଙ୍କୁ ୧୦ ହଜାର ଟଙ୍କାର ଆର୍ଥିକ ସହାୟତା ଯୋଗାଇଦିଆଯିବ । ଏହି ସହାୟତା ସେମାନଙ୍କ ବ୍ୟବସାୟର ପୁନରୁଦ୍ଧାର ଲାଗି ଆବଶ୍ୟକ । ସେହିପରି ଓଡ଼ିଶାରେ ଘଟିତ ପ୍ରଳୟଙ୍କରୀ ଫନି ବାତ୍ୟାରେ ମଧ୍ଯ ଅଧିକ ସଂଖ୍ୟାରେ ନଡ଼ିଆ ଗଛ କ୍ଷତିଗ୍ରସ୍ତ ହୋଇଛି । ଏହା ସାଧାରଣତଃ ଉପକୂଳ ଅଞ୍ଚଳରେ ମୁଖ୍ୟ ଜୀବିକା ଓ ରୋଜଗାରର ଏକ ମାତ୍ର ମାଧ୍ୟମ ହୋଇଥାଏ । ତେଣୁ ନଡ଼ିଆ ଚାଷୀଙ୍କୁ ପୂର୍ବରୁ ଘୋଷଣା ହୋଇଥିବା କୃଷି ଇନପୁଟ ସବସିଡ଼ି ଏବଂ ଚାରା ଓ ବୃକ୍ଷ ରୋପଣ ସହାୟତା ସହିତ କ୍ଷତିଗ୍ରସ୍ତ ହୋଇଥିବା ନଡ଼ିଆ ଗଛ ପିଛା ୫୦୦ ଟଙ୍କା କରି ଆର୍ଥିକ ସହାୟତା ମିଳିବ । ଜଣେ ଚାଷୀଙ୍କୁ ସର୍ବାଧିକ ୨୫ଟି ନଡ଼ିଆ ଗଛ ପାଇଁ ଆର୍ଥିକ ସହାୟତା ଦିଆଯିବ । ଭୟଙ୍କର ବାତ୍ୟା ଫନିରେ ଛୋଟ ଛୋଟ କୁକୁଡ଼ା ଚାଷୀମାନେ ମଧ୍ୟ ବୋହୁ ସଂଖ୍ୟାରେ କ୍ଷତିଗ୍ରସ୍ତ ହୋଇଛନ୍ତି । ବାତ୍ୟା ପ୍ରଭାବିତ ଅଞ୍ଚଳ ମାନଙ୍କରେ କୁକୁଡ଼ା ଚାଷୀଙ୍କୁ ବ୍ରଏଲର୍ ୟୁନିଟର ଥଇଥାନ ଲାଗି ୭୫ ପ୍ରତିଶତ ସବସିଡ଼ି ପ୍ରଦାନ କରାଯିବ । ଅନ୍ୟୁନ ୫୦୦ କୁକୁଡ଼ା ରଖିଥିବା ୟୁନିଟକୁ ଏକ ଲକ୍ଷ ଟଙ୍କା ପର୍ଯ୍ୟନ୍ତ ସବସିଡ଼ି ପ୍ରଦାନ କରାଯିବ । ଏହି ପ୍ରକ୍ରିୟା ମାଧ୍ୟମରେ ୨୦୦୦ କ୍ଷୁଦ୍ର ବ୍ରଏଲର୍ ୟୁନିଟକୁ ଆର୍ଥିକ ସହାୟତା ପ୍ରଦାନ କରାଯିବ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି ।