ଭୁବନେଶ୍ୱର, ନିରପେକ୍ଷ ଖବର: ୧୦/୦୧/୨୦୧୯ ବିଜେବି ସ୍ୱୟଂଶାସିତ ମହାବିଦ୍ୟାଳୟ ପରିସରରେ ପାଇକ ବିଦ୍ରୋହ ସ୍ମୃତିଚିତ୍ର ଓ ଲିଫଟ୍ ଲୋକାର୍ପିତ ହୋଇଛି । ଉଚ୍ଚଶିକ୍ଷା ମନ୍ତ୍ରୀ ଶ୍ରୀ ଅନନ୍ତ ଦାସ ଓ ପର୍ଯ୍ୟଟନ, ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ମନ୍ତ୍ରୀ ଶ୍ରୀ ଅଶୋକ ଚନ୍ଦ୍ର ପଣ୍ଡା ଏହି ଉଦ୍ଘାଟନ କାର୍ଯ୍ୟକ୍ରମରେ ଉପସ୍ଥିତ ଥିଲେ । ଭାରତର ପ୍ରଥମ ସ୍ୱାଧୀନତା ସଂଗ୍ରାମ ଓଡ଼ିଶାର ପାଇକ ବିଦ୍ରୋହର ୨୦୦ ବର୍ଷ ପୂର୍ତ୍ତି ଉପଲକ୍ଷେ କଲେଜ୍ କ୍ୟାମ୍ପସ୍ରେ ଥିବା ବକ୍ସି ଗାର୍ଡନ୍ ଚତୁଃପାଶ୍ୱର୍ସ୍ଥ ପ୍ରାଚୀରରେ ବିଭୂତି କାନୁନଗୋ ଚାରୁ ଓ କାରୁକଳା ମହାବିଦ୍ୟାଳୟର ସହଯୋଗରେ ପାଇକ ବିଦ୍ରୋହର ସ୍ମୃତି ବହନକାରୀ ବିଭିନ୍ନ ଜୀବନ୍ତ ଓ ଆକର୍ଷଣୀୟ ବହୁରଙ୍ଗୀ ଚିତ୍ର ଅଙ୍କନ କରାଯାଇଛି । ସଂସ୍କୃତି ମନ୍ତ୍ରୀ ଶ୍ରୀ ପଣ୍ଡା ନିଜ ବିଭାଗରୁ ଏଥିପାଇଁ ଅର୍ଥ ବ୍ୟବସ୍ଥା କରିଥିଲେ । ଉପନିବେଶବାଦୀ
ଶାସନର ବିଲୋପ ଘଟାଇ ଭାରତର ସ୍ୱାଧୀନତା ପାଇଁ ସଂଗ୍ରାମ ଚଳାଇଥିବା ପାଇକବିଦ୍ରୋହର ମହାରଥୀ ବକ୍ସି ଜଗବନ୍ଧୁ ବିଦ୍ୟାଧର ଭ୍ରମରବର ରାୟ ମହାପାତ୍ରଙ୍କ ସ୍ମୃତିରେ ନାମିତ ଏହି ସ୍ୱୟଂଶାସିତ କଲେଜ୍ରେ ପାଇକବିଦ୍ରୋହ ସ୍ମୃତିଚିତ୍ର ଛାତ୍ରଛାତ୍ରୀମାନଙ୍କୁ ଅନୁପ୍ରାଣିତ କରିବ ବୋଲି ମନ୍ତ୍ରୀ ଉଲ୍ଲେଖ କରିଥିଲେ । କଲେଜ୍ ପରିସରର ସୌନ୍ଦର୍ଯ୍ୟକରଣକୁ ଏହା ଋଦ୍ଧିମନ୍ତ କରିବା ସହିତ ଛାତ୍ରଛାତ୍ରୀ ତଥା ସଚେତନ ନାଗରିକଙ୍କ ଦ୍ୱାରା ପ୍ରଶଂସିତ ହେବ
ବୋଲି ମନ୍ତ୍ରୀ ଶ୍ରୀ ଦାସ ଓ ଶ୍ରୀ ପଣ୍ଡା ଆଶାପ୍ରକାଶ କରିଥିଲେ ।
ଦିବ୍ୟାଙ୍ଗ, ବରିଷ୍ଠ ନାଗରିକ ଓ କଲେଜ୍ର ପ୍ରଫେସର
ତଥା କର୍ମଚାରୀଙ୍କ ନିମନ୍ତେ ନବନିର୍ମିତ ଲିଫଟ୍ ମଧ୍ୟ ମନ୍ତ୍ରୀ ଦ୍ୱୟଙ୍କ ଦ୍ୱାରା ଲୋକାର୍ପିତ ହୋଇଥିଲା । ଏହି ଲିଫଟ୍ ଲୋକାର୍ପଣ ହେତୁ କଲେଜ୍ର ଏକ ଜରୁରୀ ଆବଶ୍ୟକତା ପୂର୍ଣ୍ଣ ହୋଇପାରିଛି ।
ଏହି କାର୍ଯ୍ୟକ୍ରମରେ କଲେଜ୍ର ଅଧ୍ୟକ୍ଷ ଡ. ପ୍ରସନ୍ନ କୁମାର ମହାନ୍ତି, ଉପାଧ୍ୟକ୍ଷ ଡ. ଇନ୍ଦୁ ଭୂଷଣ ମହାନ୍ତିଙ୍କ ସମେତ ସମସ୍ତ ପ୍ରଫେସର, ଛାତ୍ରଛାତ୍ରୀ ଓ କର୍ମଚାରୀମାନେ ଉପସ୍ଥିତ ଥିଲେ ।
