ଓଡିଶାରେ ବିକାଶ ଆଣିବାକୁ ହେଲେ କେନ୍ଦ୍ର ଓ ରାଜ୍ୟରେ ଦରକାର ବିଜେପି ସରକାର :ଶିବରାଜ ସିଂହ ଚୌହାନ

ଭୁବନେଶ୍ୱର ନିରପେକ୍ଷ ଖବର, ତା ୨୬/୦୩: ଦୀର୍ଘ ୧୯ ବର୍ଷ ବିଜେଡି ସରକାର ଓଡିଶାକୁ ପୂରା ବରବାଦ କରିଛି । ରାଜ୍ୟରେ କୁପୋଷଣ, ଶିଶୁ  ମୃତ୍ୟୁହାର, କୃଷକ ଆତ୍ମହତ୍ୟା, ମହିଳାଙ୍କ ପ୍ରତି ଅତ୍ୟାଚାର ବଢିଚାଲିଛି । ସୁଶାସନର ଡିଣ୍ଡିମ ପିଟୁଥିବା ବିଜେଡି ସରକାର ଲୋକଙ୍କ ପାଖରେ ମୌଳିକ ସୁବିଧା ପହଂଚାଇ ପାରି ନାହିଁ । ବିଜୁଳୀ, ପିଇବା ପାଣି, ପକ୍କା ଘର ଆଦିରୁ ଗରୀବ ଲୋକ ଏବେବି ବଂଚିତ ଅଛନ୍ତି । କଂଗ୍ରେସ ସରକାର ଥିବା ସମୟରେ ଓଡିଶାର ସ୍ଥିତି ଯାହା ଥିଲା ୧୯ ବର୍ଷ ପରେ ବି ସମାନ ସ୍ଥିତି ରହିଛି। ରାଜ୍ୟରେ ବିକାଶର ଗତି ଦେବାକୁ ହେଲେ କେନ୍ଦ୍ରରେ ଏବଂ ରାଜ୍ୟରେ ବିଜେପି ସରକାର ହେବା ଦରକାର । ୨ ଚକା ଲାଗିଲେ ଓଡିଶାର ବିକାଶ ହେବା ସହ ସମସ୍ତ ସମସ୍ୟାର ସମାଧାନ ହୋଇପାରିବ ବୋଲି ବିଜୟ ସଂକଳ୍ପ ସମାବେଶରୁ ଫେରି ରାଜ୍ୟ କାର୍ଯ୍ୟାଳୟରେ ବିବୃତି ରଖିଛନ୍ତି  ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଓ ରାଷ୍ଟ୍ରୀୟ ଉପସଭାପତି ଶ୍ରୀ ଶିବରାଜ ସିଂହ ଚୌହାନ । ଶ୍ରୀ ଚୌହାନ କହିଛନ୍ତି ଯେ, ମୋଦି ସରକାର ସାରା ଦେଶରେ ଆୟୁଷ୍ମାନ ଭାରତ ଯୋଜନା ଲାଗୁ କରିବା ସତ୍ୱେ ରାଜ୍ୟ ସରକାର
ଏହାକୁ ରାଜନୈତିକ ଉଦ୍ଦେଶ୍ୟ ରଖି ଲାଗୁ କରୁନାହାଁନ୍ତି । ରୋଗୀମାନଙ୍କ ସହ ନବୀନ ବାବୁ ଅନ୍ୟାୟ କରୁଛନ୍ତି । ସାଧାରଣ ଗରିବ ଲୋକଙ୍କ ଚିକିତ୍ସା ପାଇଁ ମୋଦି ସରକାର ଅର୍ଥ ଦେଉଥିବାବେଳେ ନବୀନ ବାବୁ କାହିଁକି ଏହାକୁ ଲାଗୁ କରୁନାହାଁନ୍ତି ବୋଲି ଶ୍ରୀ ଚୌହାନ ପ୍ରଶ୍ନ କରିଛନ୍ତି । ସେହିପରି ପ୍ରଧାନମନ୍ତ୍ରୀ କିଷାନ ନିଧି ଯୋଜନା ଅନୁଯାୟୀ ରାଜ୍ୟ ସରକାର କେନ୍ଦ୍ରକୁ ଚାଷୀମାନଙ୍କର ତାଲିକା ଦେବାରେ ବିଳମ୍ବ  କରୁଛନ୍ତି । ହୀନ ରାଜନୈତିକ ଉଦ୍ଦେଶ୍ୟ ରଖି ବିଜେଡି ସରକାର ଏପରି କରୁଛି ବୋଲି ଶ୍ରୀ ଚୌହାନ ଅଭିଯୋଗ କରିଛନ୍ତି । ଅନ୍ୟପଟେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ୭୨ ହଜାର ଟଙ୍କା ଗ୍ୟାରେଂଟି କାର୍ଡ ଦେବାକୁ କହିବା ଘଟଣାକୁ ଶ୍ରୀ ଚୌହାନ ଦୃଢ ନିନ୍ଦା କରିଛନ୍ତି । ରାହୁଲ ହେଉଛନ୍ତି ସବୁଠୁ ବଡ ମିଛୁଆ । କଂଗ୍ରେସ ଯେତେ ପ୍ରତିଶୃତି ଦେଇଛି ତାହା କିଛି ପୂରଣ କରିନି । ୫୫ ବର୍ଷ ଧରି କଂଗ୍ରେସ ଶାନ ପରେ ବି ଦେଶରୁ ଗରିବୀ ହଟିଲା ନାହିଁ । ସେ ଗରିବଙ୍କ ପାଇଁ କିଛି କରିନାହାଁନ୍ତି । ପୂର୍ବରୁ ଋଣ ଛାଡ କରିବା କହି ସେ ଚାଷୀମାନଙ୍କୁ ଧୋକ୍କା ଦେଇଛନ୍ତି ବୋଲି ଶ୍ରୀ ଚୌହାନ କହିଛନ୍ତି । ଦେଶର ଜନତା ମଜବୁତ ସରକାର ଚାହୁଁଥିବା ବେଳେ ନବୀନ ବାବୁ ମଜବୁତ ସରକାର ହେବାକୁ ଚାହୁଁନାହାଁନ୍ତି । କଂଗ୍ରେସ ସରକାରର ଗଠବନ୍ଧନ ଏବେ ଠକବନ୍ଧନରେ ପରିଣତ ହୋଇଛି ଗଠବନ୍ଧନରେ ହାତ ମିଶାଉଥିବା ନେତାଙ୍କର ହୃଦୟ ମିଶୁନି । ୟୁପିଏ ସରକାର ସମୟରେ ସଂସଦରେ ଆକ୍ରମଣ ହୋଇଥିବାବେଳେ କଂଗ୍ରେସ ସରକାର ଚୁପ ରହିଥିଲା । କିନ୍ତୁ ବିଜେପି ସରକାର ଏବେ ଆତଙ୍କବାଦ ବିରୁଦ୍ଧରେ ମୁହଁତୋଡ ଜବାବ ଦେଉଛି । ସାରା ଦେଶ ଆଜି ପ୍ରଧାନମନ୍ତ୍ରୀ ମୋଦିଙ୍କ ସହ ରହିଛି । ଦେଶର ୧୬ ଟି ରାଜ୍ୟରେ ଏବେ ବିଜେପି ସରକାର ଚାଲିଛି । ଆଗାମୀ ଦିନରେ ଓଡିଶାରେ ରଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା ଦେଇଥିବା ଲକ୍ଷ୍ୟ ମିଶନ
୧୨୦+ ନିଶ୍ଚିତ ପୂରଣ ହେବ ଏବଂ ରାଜ୍ୟ ଏବଂ କେନ୍ଦ୍ରରେ ବିଜେପି ସରକାର ହେବ ବୋଲି ଶ୍ରୀ ଚୌହାନ ଦୃଢୋକ୍ତି ପ୍ରକାଶ କରିଛନ୍ତି ।