* ମୁଣ୍ଡରେ ହାତଦେଇ ବସିଛନ୍ତି ଚାଷୀ…..
ଭଦ୍ରକ, ତିହିଡି ୪/୮,(ନିରପେକ୍ଷଖବର): ଶ୍ରାବଣ ମାସ ସାରିବାକୁ ବସିଲାଣି, କିନ୍ତୁ ବର୍ଷାର ଦେଖାଦର୍ଶନ ମିଳୁନି। କେଉଁଠି ଜମି ଫାଟି ଆଁ କଲାଣି ତ ଆଉ କେଉଁ କ୍ଷତ ହଳଦିଆ ପଡ଼ିଗଲାଣି। ବର୍ଷା ଜଳ ଉପରେ ନିର୍ଭର କରୁଥିବା କୃଷକମାନେ ରୁଆ ବେଉଷଣ କରି ନପାରି ମୁଁଣ୍ଡରେ ହାତ ଦେଇ ବସି ଛନ୍ତି । ଚଳିତ ବର୍ଷ ଅନୁକୂଳ ପାଗ ଦେଖୁ ଚାଷ କାର୍ଯ୍ୟ ଆରମ୍ଭ କରିବାକୁ ଅଣ୍ଟା ଭିଡି ଥିଲେ କୃଷକ । କରୋନା ମହାମାରୀ ଯୋଗୁ ଅନେକ ଅସୁବିଧାର ସମ୍ମୁଖୀନ ହୋଇ ମଧ୍ୟ ଚାଷ କାମ କରିବାକୁ ଲାଗିଲେ ।
ଶହଶହ ହେକ୍ଟର ଜମି ବିହନ ବୁଣାବୁଣି ଓ ତଳି ପଟାଳି ପ୍ରସ୍ତୁତ କରି ମୁଣ୍ଡରେ ହାତଦେଇ ବସିଛନ୍ତି ଚାଷୀ। ଏବେ ରୁଆ ବେଉଷଣ କରିବା ସହିତ ବିଲ ବଛା ସରିଥାନ୍ତା । ମାତ୍ର ମାସେ ହେଲାଣି ସୟା ଗ୍ରାପଞ୍ଚାୟତ ସମେତ ତିହିଡି ବ୍ଲକର ବିଭିନ୍ନ ଅଞ୍ଚଳରେ ବର୍ଷାର ଦେଖା ନାହିଁ । ଜମି ଫାଟି ଆଁ ହେଲାଣି । ଧାନ ଫସଲ ହଳଦିଆ ଦେଖାଯାଉଛି । ଅନାବୃଷ୍ଟି ଯୋଗୁଁ ଚାଷ କାମ ବିଳମ୍ବ ହେଉଥିବା ବେଳେ ଚାଷୀ ମାନେ ଚିନ୍ତାରେ ପଡିଛନ୍ତି । ସଅଳ ଅମଳକ୍ଷମ ଧାନ ତଳି ରୁଆ ବେଉଷଣ ସମୟ ଅତିକ୍ରାନ୍ତ ହୋଇଗଲାଣି । ଫଳରେ ଅନେକ ସ୍ଥାନରେ ଚାଷ ଜମିରେ ଗୋରୁ ଚରିଲେଣି । ଆଗକୁ ପରିସ୍ଥିତି ବିଗିଡିବା ଅନୁମାନ କରାଯାଉଛି । ଗାଁ ଫେରନ୍ତା ପ୍ରବାସୀ ଓଡ଼ିଆଙ୍କ ନିମନ୍ତେ କିଛି କାମଧନ୍ଦା ମିଳୁ ନାହିଁ । ଚାଷ ଉପରେ ନିର୍ଭର କରୁଥିବା ବେଳେ ସ୍ୱଳ୍ପ ବୃଷ୍ଟିପାତ ନେଇ ଚିନ୍ତିତ ଅବସ୍ଥାରେ ଅଛନ୍ତି । ମେଗା ସେଚ ପ୍ରକଳ୍ପ ଦ୍ବାରା ଜମିକୁ ଜଳ ଯୋଗାଣ କରିବା କାର୍ଯ୍ୟକୁ ଅଗ୍ରାଧିକାର ଭିଭିରେ ଶେଷ କରାଯାଉ । ଏବେଠୁ ସରକାର ଚାଷୀଙ୍କ ନିମନ୍ତେ ପ୍ରୋତ୍ସାହନ ଯୋଗାଇ ଦେବାକୁ ବ୍ୟବସ୍ଥା କରିବାକୁ କୃଷକମାନେ ନିବେଦନ କରିଛନ୍ତି । ଫସଲ ବୀମା କରି ବା ଧାର୍ଯ୍ୟ ସମୟ ବୃଦ୍ଧି କରିବାକୁ ଦାବି ହେଉଛି ।
