ଭୁବନେଶ୍ୱର, ନିରପେକ୍ଷ ଖବର:୧୯/୦୭/୧୯: ଓଡ଼ିଶାର ରାଜଧାନୀ ଭୁବନେଶ୍ୱରର ସମ୍ବ୍ରାନ୍ତ ଅଞ୍ଚଳ କୁହାଯାଉଥିବା ଶହୀଦ ନଗର ଏବେ ଅସୁରକ୍ଷିତ ହୋଇପଡିଛି। ଅସାମାଜିକ ଲୋକଙ୍କ ଆଡ୍ଡାସ୍ଥଳରେ ପରିଣତ ହୋଇଛି। ଏଠାରେ ଦିନ ଦ୍ୱିପହରେ ଲୁଟତରାଜ ମଧ୍ୟ ଚାଲୁଛି। କାହା ପାଖରୁ ବନ୍ଧୁକ ଦେଖାଇ ଲୁଟେରାମାନେ ଲୁଟ କରୁଛନ୍ତି ତ ଆଉ ପାଖରୁ ଭୁଜାଲିରେ ହାଣି ଲୁଟ ହେଉଛି। ତଥାପି ସୁରକ୍ଷା କର୍ମୀମାନେ ଲୁଟେରାଙ୍କୁ ଧରିବାରେ ସକ୍ଷମ ହୋଇପାରୁ ନାହାନ୍ତି। ସବୁଠାରୁ ବଡ ଆଶ୍ଚର୍ଯ୍ୟର କଥା ଯେ, ପ୍ରତ୍ୟେକ ଦିନ ସହିଦନଗରରେ ଏଭଳି ଆତଙ୍କି ଘଟଣା ଘଟୁଥିଲେ ବି ଏହି ଅଂଚଳରେ ଆବଶ୍ୟକୀୟ ସୁରକ୍ଷା କର୍ମୀଙ୍କୁ ମୁତୟନ କରାଯାଉ ନାହିଁ। ଯାହାଫଳରେ ଲୋଟେରାମାନେ ଲୁଟ କରି ଖସିଯିବାକୁ ସକ୍ଷମ ହେଉଛନ୍ତି ବୋଲି ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ସହିଦନଗରରେ ଅନେକ ସମୟରେ ଏଭଳି ଘଟଣା ଦେଖିବାକୁ ମିଳୁଛି । ରାସ୍ତା ଘାଟ ଓ ଜନ ଗହଳି ପୂଣ୍ଣ ସ୍ଥାନରେ ଅସାମାଜିକ ଯୁବକଙ୍କର ରାଜୁତି ଦିନକୁ ଦିନ ବଢ଼ିବାରେ ଲାଗିଛି। ଏପରିକି ରାସ୍ତାରେ ଯାଉଥିବା ସାଧାରଣ ଲୋକେ ନିଜକୁ ସୁରକ୍ଷିତ ମଣୁନାହାନ୍ତି। ଗତ ମଙ୍ଗଳବାର ସନ୍ଧ୍ୟାରେ ଭବାନୀ ମଲ୍ ସାମ୍ନା ଜନଗହଳି ପୂର୍ଣ୍ଣ ରାସ୍ତାରେ ମାରଣାସ୍ତ୍ର ଧରି ଗୁଣ୍ଡାମାନେ ଗଣ୍ଡଗୋଳ କରି ସହଜରେ ଖସିଯାଇଥିଲେ। ଯାହା ସ୍ଥାନୀୟ ଲୋକଙ୍କୁ ଆଶ୍ଚର୍ଯ୍ୟ କରିଛି। କମିଶନରେଟ ପୁଲିସର ସ୍ଥାଣୁତା ପାଇଁ ଲୋକେ ପୋଲିସ ଉପରୁ ବିଶ୍ୱାସ ହରାଇବାକୁ ବସିଲେଣି। ସହିଦନଗରର ସୁରକ୍ଷା ପାଇଁ ଅଧିକ ସଂଖ୍ୟାରେ ପୁଲିସ ମୁତୟନ କରିବାକୁ ଅଞ୍ଚଳବାସୀ ଦାବି କରିଛନ୍ତି।
