ଗେଲ୍ (ଇଣ୍ଡିଆ) ଲିମିଟେଡ୍ ଦ୍ୱାରା ବଲାଙ୍ଗୀରରେ ନିର୍ମାଣ ହେବ ଇନ୍ଡୋର୍ ଷ୍ଟାଡିୟମ୍..

ବଲାଙ୍ଗୀର (ଓଡ଼ିଶା), ଜାନୁୟାରୀ ୧୪, ୨୦୧୯: ଓଡ଼ିଶାରେ କ୍ରୀଡ଼ା ସୁବିଧାର ଉନ୍ନତି ପାଇଁ ମାନ୍ୟବର କେନ୍ଦ୍ର ପେଟ୍ରୋଲିୟମ୍ ଏବଂ ପ୍ରାକୃତିକ ଗ୍ୟାସ୍ ତଥା ଦକ୍ଷତା ବିକାଶ ଓ ଉଦ୍ୟମିତା ମନ୍ତ୍ରୀ ଶ୍ରୀ ଧର୍ମେନ୍ଦ୍ର ପ୍ରଧାନ   ୪.୫ କୋଟି ଟଙ୍କା ମୂଲ୍ୟରେ ଏକ ଇନ୍ଡୋର୍ ଷ୍ଟାଡିୟମ୍ ନିର୍ମାଣ ପାଇଁ ଭିତ୍ତିପ୍ରସ୍ତର ସ୍ଥାପନ କରିଛନ୍ତି ।
ସ୍ଥାନୀୟ ପୃଥ୍ୱୀରାଜ ଉଚ୍ଚ ବିଦ୍ୟାଳୟରେ ନିର୍ମିତ ହେବାକୁ ଥିବା ଏହି ଷ୍ଟାଡିୟମ୍ର ଭିତ୍ତିପ୍ରସ୍ତର ସ୍ଥାପନ ଅବସରରେ ମାନ୍ୟବର ବିରୋଧୀ ଦଳ ମୁଖ୍ୟ, ଓଡ଼ିଶା ବିଧାନସଭା ତଥା ବଲାଙ୍ଗୀର ବିଧାୟକ ଶ୍ରୀ ନରସିଂହ ମିଶ୍ର, ମାନ୍ୟବର ସାଂସଦ, ବଲାଙ୍ଗୀର ଶ୍ରୀ କଳିକେଶ ନାରାୟଣ ସିଂହଦେଓ, ମାନ୍ୟବର ବିଧାୟକ, ପାଟଣାଗଡ଼ ଶ୍ରୀ କନକ ବର୍ଦ୍ଧନ ସିଂହଦେଓ, ପୂର୍ବତନ ସାଂସଦ, ବଲାଙ୍ଗୀର ଶ୍ରୀମତି ସଂଙ୍ଗୀତା ନାରାୟଣ ସିଂଦେଓ, ପ୍ରଧାନ ଶିକ୍ଷୟିତ୍ରୀ ପୃଥ୍ୱୀରାଜ ଉଚ୍ଚ ବିଦ୍ୟାଳୟ ଶ୍ରୀମତି ସନ୍ତୋଷିନି ସେଠୀ, ଗେଲ ଇଣ୍ଡିଆ ମାନବ ସମ୍ବଳ ନିର୍ଦ୍ଦେଶକ ଶ୍ରୀ ପି. କେ. ଗୁପ୍ତା ଏବଂ ବିଦ୍ୟାଳୟର ବିଦ୍ୟାର୍ଥୀଗଣ ତଥା ଅନ୍ୟାନ୍ୟ ଅତିଥିଗଣ ଉପସ୍ଥିତ ଥିଲେ ।
ଗେଲ୍ (ଇଣ୍ଡିଆ) ଲିମିଟେଡ୍ ପକ୍ଷରୁ କର୍ପୋରେଟ୍ ସାମାଜିକ ଦାୟିତ୍ୱ ଉଦ୍ୟମ ଆଧାରରେ ଏହି ଷ୍ଟାଡିୟମ୍ ନିର୍ମିତ ହେବ । ଏଥିରେ ଏକ ମୁଖ୍ୟ ପ୍ରକୋଷ୍ଠ, ଚାରିଟି ବ୍ୟାଡ଼୍ମିଣ୍ଟନ୍ କୋର୍ଟ, ଗୋଟିଏ ଟେବୁଲ ଟେନିସ୍ ଅଭ୍ୟାସ ପ୍ରକୋଷ୍ଠ ଏବଂ ଗ୍ୟାଲେରୀ ସମେତ କ୍ରୀଡ଼ାବିତ୍ଙ୍କ ପାଇଁ ପୋଷାକ ପରିବର୍ତ୍ତନ କକ୍ଷ, ଲକର୍ ଏବଂ ଅନ୍ୟାନ୍ୟ ସୁବିଧା ଉପଲବ୍ଧ ହେବ । ପୂର୍ବ ଯନ୍ତ୍ରୀକୃତ ନିର୍ମାଣ ଜ୍ଞାନକୌଶଳ ଆଧାରରେ ଉଚ୍ଚ ଗୁଣମାନ ନିୟନ୍ତ୍ରିତ ଭାବରେ ଦ୍ରୁତ ନିର୍ମାଣ କାର୍ଯ୍ୟ କରାଯିବ ।
୪.୫ କୋଟି ଟଙ୍କା ମୂଲ୍ୟରେ ନିର୍ମିତ ହେବାକୁ ଥିବା ଏହି ଷ୍ଟାଡିୟମ୍ରେ ବର୍ଷାଜଳ ଅମଳ ଏବଂ ସୌରଶକ୍ତି ସାହାଯ୍ୟରେ ବାହ୍ୟ ଆଲୋକୀକରଣର ବ୍ୟବସ୍ଥା ମଧ୍ୟ ଉପଲବ୍ଧ ହେବ ।
ଗେଲ୍ (ଇଣ୍ଡିଆ) ଲିମିଟେଡ୍ ଦେଶର ପ୍ରମୁଖ ପ୍ରାକୃତିକ ଗ୍ୟାସ୍ କମ୍ପାନୀ, ଯାହା “ପ୍ରଧାନମନ୍ତ୍ରୀ ଉର୍ଜାଗଙ୍ଗା’ ନାମରେ ଜଣାଶୁଣା ଜଗଦୀଶପୁର-ହଳଦିଆ ଓ ବୋକାରୋ-ଧାମରା ପାଇପ୍ ଲାଇନ୍ ନିର୍ମାଣ କରୁଛି । ଗେଲ୍ ମଧ୍ୟ ଭୁବନେଶ୍ୱର ଏବଂ କଟକରେ ସହରୀ ଗ୍ୟାସ୍ ବିତରଣ କାର୍ଯ୍ୟ ପରିଚାଳନା କରୁଛି ।

ଗେଲ୍ ଅନେକ କ୍ରୀଡ଼ାଭିତ୍ତିକ କାର୍ଯ୍ୟକ୍ରମରେ ଉଦୀୟମାନ ଏବଂ ପ୍ରତିଷ୍ଠିତ ପ୍ରତିଭାଧରଙ୍କୁ ସହାୟତା ପ୍ରଦାନ କରୁଛି ଏବଂ ଦେଶର ଶ୍ରେଷ୍ଠ କ୍ରୀଡ଼ାପ୍ରତିଭାଙ୍କୁ ଲୋକଲୋଚନକୁ ଆଣିବାପାଇଁ ବିଭିନ୍ନ କାର୍ଯ୍ୟକ୍ରମମାନକୁ ପ୍ରୋତ୍ସାହନ ଯୋଗାଉଛି । ତନ୍ମଧ୍ୟରୁ “ଗେଲ୍ ରଫ୍ତାର୍’ ଦୌଡ଼କୁଦ ପ୍ରତିଭା ଅନ୍ୱେଷଣ ଅନ୍ୟତମ ଯାହା ଅଲିମ୍ପିକ୍ କ୍ରୀଡ଼ାରେ ଭାରତର ପ୍ରତିନିଧିତ୍ୱ କରିବାପାଇଁ ଉପଯୁକ୍ତ ଦୌଡ଼କୁଦ କ୍ରୀଡ଼ାବିତ୍ଙ୍କୁ ଚିହ୍ନଟ କରିବାକୁ ପ୍ରୟାସ କରୁଛି ।