କାଳିଆ ଯୋଜନାରେ ଯୋଡିହେବା ପାଇଁ ହିତାଧିକାରୀ କୃଷକ ସବୁଜ ରଙ୍ଗର ଫର୍ମକୁ ବ୍ୟବହାର ନିମନ୍ତେ ରାଜ୍ୟ ସରକାରଙ୍କ ଗୁରୁତ୍ୱ…

ଭୁବନେଶ୍ୱର, ନିରପେକ୍ଷ ଖବର : ‘କାଳିଆ’ ଯୋଜନା ହେଉଛି ଏକ ଅଭିନବ ପଦକ୍ଷେପ ଯାହାକି କୃଷକମାନଙ୍କ ହିତସାଧନ ପାଇଁ ଉଦ୍ଦିଷ୍ଟ । ‘କାଳିଆ’ର ଅର୍ଥ ହେଉଛି-କୃଷକଙ୍କ ଜୀବନ ଜୀବିକା ଏବଂ ଆୟବୃଦ୍ଧି ପାଇଁ ସହାୟତା । ଏହି ଯୋଜନାଟିକୁ ଓଡ଼ିଶାର ମାନ୍ୟବର ମୁଖ୍ୟମନ୍ତ୍ରୀ ୨୦୧୮ ମସିହା ଡିସେମ୍ବର ୩୧ ତାରିଖ ଦିନ ଶୁଭାରମ୍ଭ କରିଛନ୍ତି, ଯାହାକି ରାଜ୍ୟରୁ ଦାରିଦ୍ର‌୍ୟ ଦୂରୀକରଣ ଏବଂ କୃଷିର ବିକାଶକୁ ତ୍ୱରାନ୍ୱିତ କରିବାରେ ସହାୟକ ହେବ ।
ରାଜ୍ୟର ୬,୭୯୯ଟି ଗ୍ରାମପଞ୍ଚାୟତରେ ‘କାଳିଆ ଯୋଜନା’ର ହିତାଧିକାରୀଙ୍କ ଚିଠାତାଲିକା ଉପଲବ୍ଧ ହୋଇସାରିଛି । ଚିଠା ତାଲିକାକୁ ଯାଞ୍ଚ କରିବା ପରେ, ଚିଠା ତାଲିକାରେ ଯଦି ଚାଷୀଙ୍କର ନାମ ନଥିବ ତେବେ ଗ୍ରାମପଞ୍ଚାୟତ କାର୍ଯ୍ୟାଳୟରେ ମିଳୁଥିବା ସବୁଜ ରଙ୍ଗର ଫର୍ମକୁ ପୂରଣ କରି ଆବଶ୍ୟକୀୟ କାଗଜପତ୍ର ସଂଲଗ୍ନ କରି ସେଠାରେ ରଖାଯାଇଥିବା ସବୁଜ ଡ୍ରପବକ୍ସରେ ପକାଇବେ ।
ଚିଠା ତାଲିକାରୁ ଯଦି ହିତାଧିକାରୀ ତାଙ୍କ ନିଜର ନାମକୁ ବାଦ୍ ଦେବାକୁ ଚାହାଁନ୍ତି ତେବେ ସେ ପଞ୍ଚାୟତ କାର୍ଯ୍ୟାଳୟରେ ଉପଲବ୍ଧ ନାଲି ରଙ୍ଗର ଫର୍ମକୁ ପୂରଣ କରି ଆବଶ୍ୟକୀୟ ପ୍ରମାଣପତ୍ର ସେଠାରେ ରଖାଯାଇଥିବା ନାଲି ଡ୍ରପବକ୍ସରେ ପକାଇବେ । ସେହିଭଳି ଭାବରେ ଏହି ନାଲି ଫର୍ମ ମାଧ୍ୟମରେ ଜଣେ ଚାଷୀ ବା ଯେକୌଣସି ବ୍ୟକ୍ତି ମଧ୍ୟ ନିର୍ଦ୍ଦିଷ୍ଟ କର୍ତ୍ତୁପକ୍ଷଙ୍କୁ ଅଭିଯୋଗ ଦାଖଲ କରିପାରିବେ ।
କେନ୍ଦ୍ର ଓ ରାଜ୍ୟ ସରକାରୀ / ସରକାରୀ ଉଦ୍ୟୋଗରେ କାର୍ଯ୍ୟରତ ବା ଅବସରପ୍ରାପ୍ତ କର୍ମଚାରୀ; ଆୟକର ଦାତା କୃଷକ କିମ୍ବା ତାଙ୍କର ସ୍ୱାମୀ ବା ସ୍ତ୍ରୀଙ୍କ ନାମକୁ ବାଦ୍ ଦେବା ପାଇଁ ନାଲି ରଙ୍ଗର ଫର୍ମ ପୂରଣ କରି ଏହାକୁ ନାଲି ରଙ୍ଗର ଡ୍ରପବକ୍ସରେ ପକାନ୍ତୁ ।
୨୦୧୯ ଜାନୁଆରୀ ୧୦ ତାରିଖ ମଧ୍ୟରେ ଚାଷୀ ତାଙ୍କ ନାମକୁ ହିତାଧିକାରୀ ତାଲିକାରେ ଯୋଗ କିମ୍ବା ବାଦ୍ ଦେବା ପାଇଁ ସବୁଜ ତଥା ନାଲି ଫର୍ମ ପୂରଣ କରି ଗ୍ରାମ ପଞ୍ଚାୟତ କାର୍ଯ୍ୟାଳୟରେ ଜମା କରିବେ । ଜାନୁଆରୀ ମାସ ୨ ତାରିଖରୁ ସମସ୍ତ ଗ୍ରାମ ପଞ୍ଚାୟତରେ ଚିଠା ତାଲିକାଗୁଡିକ ପ୍ରକାଶିତ ହୋଇଯାଇଅଛି । ଗ୍ରାମ ପଞ୍ଚାୟତ କାର୍ଯ୍ୟାଳୟ ଦ୍ୱାରା ହସ୍ତଗତ ହୋଇଥିବା ସମସ୍ତ ସବୁଜ ଏବଂ ନାଲି ଫର୍ମଗୁଡିକୁ ଯାଞ୍ଚ କରି କେଉଁମାନେ ଏହି ଚିଠା ତାଲିକାରେ ଯୋଗ କିମ୍ବା ବାଦ୍ ପଡିବେ ତାହାର ବିବରଣୀ ସରକାରଙ୍କ ଦ୍ୱାରା ପରବର୍ତ୍ତୀ ପର୍ଯ୍ୟାୟରେ ପ୍ରକାଶିତ ହେବ ।
‘କାଳିଆ’ ବାର୍ତ୍ତା ହେଉଛି ରାଜ୍ୟ ସରକାରଙ୍କର ‘କାଳିଆ ଯୋଜନା’ ସୂଚନା ସମ୍ବନ୍ଧୀୟ ଏକ ଅଭିନବ ସେବା, ଯାହାକି ନୂତନ ଭାବେ ଶୁଭାରମ୍ଭ କରାଯାଇଥିବା ଏହି ଯୋଜନା ସମ୍ବନ୍ଧରେ କୃଷକମାନଙ୍କୁ ଅବଗତ କରାଇଥାଏ । ଆଜି ସୁଦ୍ଧା ଏହି ସୂଚନା ପ୍ରକ୍ରିୟାରେ ପ୍ରାୟ ୩୪,୦୦୦ କୃଷକ ଯୋଗଦାନ କରିପାରିଛନ୍ତି ।
‘କାଳିଆ’ ଯୋଜନା ବିଷୟରେ ଜାଣିବା ପାଇଁ ୨ ଲକ୍ଷ ୧୮ ହଜାରରୁ ଅଧିକ ଏସ୍.ଏମ୍.ଏସ୍. ଲୋକମାନଙ୍କୁ ପଠାଇ ଦିଆଯାଇଛି ଏବଂ ଆଜି ସୁଦ୍ଧା ୨୯,୫୦୮ଜଣ କୃଷକ ‘କାଳିଆ ୱେବସାଇଟ୍’କୁ ବ୍ୟବହାର କରି ଏହି ଯୋଜନା ସମ୍ବନ୍ଧରେ ଅଧିକ ତଥ୍ୟ ଜାଣିପାରିଛନ୍ତି ।