ଭୁବନେଶ୍ୱର ,ନିରପେକ୍ଷ ଖବର: ୧୭/୦୭/୨୦୧୯ ଆସନ୍ତା ଅଗଷ୍ଟ ୭ ତାରିଖରେ ଜାତୀୟ ହସ୍ତତନ୍ତ ଦିବସ ୨୦୧୯ ପାଳନ ନିମନ୍ତେ ଆଜି ପୂର୍ବାହ୍ନରେ ସଚିବାଳୟସ୍ଥିତ ହସ୍ତତନ୍ତ, ବୟନ ଓ ହସ୍ତଶିଳ୍ପ ବିଭାଗର ସମ୍ମିଳନୀ କକ୍ଷରେ କମିଶନର ତଥା ଶାସନ ସଚିବ ଶ୍ରୀମତୀ ଶୁଭା ଶର୍ମାଙ୍କ ଅଧ୍ୟକ୍ଷତାରେ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି । କମିଶନର ତଥା ଶାସନ ସଚିବ ଅଦ୍ୟାବଧି କାର୍ଯ୍ୟର ଅଗ୍ରଗତି ସମ୍ବନ୍ଧରେ ସମୀକ୍ଷା କରିଥିଲେ । ଏହି ଉତ୍ସବରେ ଏକ ହଜାରରୁ ୧୫୦୦ ପର୍ଯ୍ୟନ୍ତ ବୁଣାକାର ଯୋଗଦାନ କରିବାର କାର୍ଯ୍ୟକ୍ରମ ରହିଛି । ବୁଣାକାର ସେବା କେନ୍ଦ୍ର, ଭୁବନେଶ୍ୱର ଓ ବୟନିକା ସମସ୍ତ ବୁଣାକାରମାନଙ୍କର ଯାତାୟତ ଓ ବସ୍ର ଆୟୋଜନ କରିବା ସହିତ ସେମାନଙ୍କର ରହଣି ଓ ଖାଦ୍ୟପେୟର ବ୍ୟାପକ ପ୍ରସ୍ତୁତି କରିବେ । ଏହି ଅବସରରେ ପଦ୍ମ ପୁରସ୍କାର ଓ ସନ୍ଥ କବୀର ପୁରସ୍କାରପ୍ରାପ୍ତ ବୁଣାକାରମାନଙ୍କୁ ଯୋଗଦେବା ପାଇଁ ଆମନ୍ତ୍ରଣ ନିମନ୍ତେ ବୁଣାକାର ସେବା କେନ୍ଦ୍ରକୁ ଦାୟିତ୍ୱ ପ୍ରଦାନ କରାଯିବ । ଏହି କାର୍ଯ୍ୟକ୍ରମର ସଫଳ ରୂପାୟନ ନିମନ୍ତେ ଆଇଟିଡିସି ଦ୍ୱାରା ବ୍ୟାନର, ହୋର୍ଡିଂ, ସାଇନେଜ୍ ଆଦି ଭୁବନେଶ୍ୱରର ପ୍ରମୁଖ ସ୍ଥାନରେ ଲଗାଯିବ । ଆଜିର ଏହି ପ୍ରସ୍ତୁତି ବୈଠକରେ ଭାରତ ସରକାରଙ୍କ ବୟନଶିଳ୍ପ ମନ୍ତ୍ରଣାଳୟର ଡାଇରେକଫର (ଟେକ୍ନିକାଲ୍) ମନୋଜ ଜୈନ, ବୟନ ଶିଳ୍ପ ନିର୍ଦ୍ଦେଶକ ଜ୍ୟୋତିପ୍ରକାଶ ଦାଶ, ସ୍ୱରାଷ୍ଟ୍ର ବିଭାଗ ଯୁଗ୍ମ ସଚିବ ରାମଚନ୍ଦ୍ର ଜେନା, ବୁଣାକାର ସେବା କେନ୍ଦ୍ରର ଉପନିର୍ଦ୍ଦେଶକ ସୁରେନ୍ଦ୍ର କୁମାର ପାତ୍ର, ପଶ୍ଚିମାଞ୍ଚଳ ଜୋନ୍ ଯୁଗ୍ମ ନିର୍ଦ୍ଦେଶକ ତଥା ସମ୍ବଲପୁରୀ ବସ୍ତ୍ରାଳୟର ପରିଚାଳନା ନିର୍ଦ୍ଦେଶକ ଦାଶରଥୀ ନନ୍ଦ ପ୍ରମୁଖ ପଦାଧିକାରୀ ଉପସ୍ଥିତ ଥିଲେ ।
