* ୫ ଦିନରେ ୩୬ ମେଟି୍ରକ୍ ଟନ୍ ଆମ୍ବ କାରବାର
* ପ୍ରତି ଜିଲ୍ଲାରେ ବିକ୍ରୟ କେନ୍ଦ୍ର ଖୋଲିବ ଓର୍ମାସ୍
ଭୁବନେଶ୍ୱର:ନିରପେକ୍ଷ ଖବର, ତା.୦୬/୦୬/୨୦୧୯ରିଖ
ପଞ୍ଚାୟତିରାଜ ଓ ପାନୀୟ ଜଳ ବିଭାଗ ଏବଂ ଓର୍ମାସ୍ ତରଫରୁ ଭୁବନେଶ୍ୱରରେ
ଆୟୋଜିତ ପ୍ରଥମ ରାଜ୍ୟସ୍ତରୀୟ ଆମ୍ବ ମେଳା ବୁଧବାର ଦିନ ଉଦ୍ଯାପିତ ହୋଇଯାଇଛି ।
ଉଦ୍ଯାପନୀ ସଭାରେ ଓର୍ମାସ୍ର ଅତିରିକ୍ତ ମୁଖ୍ୟ କାର୍ଯ୍ୟନିର୍ବାହୀ ଶ୍ରୀମତୀ ସ୍ୱୟଂପ୍ରଭା
ମହାନ୍ତି ମେଳାରେ ଯୋଗଦେଇଥିବା ଆମ୍ବ ଉତ୍ପାଦକ ଗୋଷ୍ଠୀ ତଥା ଆମ୍ବ ଚାଷୀମାନଙ୍କ ସହ
ଆଲୋଚନା କରିବା ସହ ମେଳାର ସଫଳତା ପାଇଁ ସେମାନଙ୍କୁ ଧନ୍ୟବାଦ ଦେଇଥିଲେ ଏବଂ
ମାନପତ୍ର ଓ ସ୍ମାରକୀ ପ୍ରଦାନ କରିଥିଲେ । ପଞ୍ଚାୟତିରାଜ ଓ ପାନୀୟ ଜଳ ବିଭାଗର ଯୁଗ୍ମ ସଚିବ
ଶ୍ରୀ ମହେଶ୍ୱର ପାଣିଗ୍ରାହୀ ଚାଷୀଙ୍କୁ ଉତ୍ସାହିତ କରିବା ସହ ଆଗାମୀ ଦିନରେ ସପୁରୀ, ପିଜୁଳି ଆଦି
ଫଳକୁ ନେଇ ଏଭଳି ମେଳା ଆୟୋଜନ ପାଇଁ ପରାମର୍ଶ ଦେଇଥିଲେ । ସଭାରେ ଚାଷୀମାନେ
ସେମାନଙ୍କ ଅନୁଭୂତି ବର୍ଣ୍ଣନା କରିଥିଲେ ।
ଜୁନ୍ ୧ ତାରିଖ ଦିନ ଏହି ଆମ୍ବ ମେଳାକୁ ଉଦ୍ଘାଟନ କରିବା ଅବସରରେ ପଞ୍ଚାୟତିରାଜ ଓ
ପାନୀୟ ଜଳ ମନ୍ତ୍ରୀ ଶ୍ରୀ ପ୍ରତାପ ଜେନା ଆମ୍ବ ଷ୍ଟଲ୍ ବୁଲି ଦେଖିବା ସହ ଚାଷୀମାନଙ୍କ ସହ
ଆଲୋଚନା କରିଥିଲେ । ରାଜ୍ୟର ଫଳ ଚାଷୀ ତଥା ଉତ୍ପାଦକ ଗୋଷ୍ଠୀମାନଙ୍କ ଦ୍ୱାରା ପ୍ରସ୍ତୁତ
ସାମଗ୍ରୀଗୁଡ଼ିକର ଉପଯୁକ୍ତ ବଜାର ସୁବିଧା ଯୋଗାଇଦେବା ପାଇଁ ଓର୍ମାସ୍ ତରଫରୁ ସବୁ ଜିଲ୍ଲା
ମୁଖ୍ୟାଳୟରେ ଅତ୍ୟାଧୁନିକ ବିକ୍ରୟ କେନ୍ଦ୍ର ଖୋଲିବାକୁ ନିର୍ଦ୍ଦେଶ ଦେଇଥିଲେ । ଏହାକୁ ତୁରନ୍ତ
କାର୍ଯ୍ୟକାରୀ କରିବା ସହ ଚାଷୀ ଓ ଉତ୍ପାଦକ ଗୋଷ୍ଠୀମାନଙ୍କୁ ସମସ୍ତ ସହାୟତା ଯୋଗାଇ ଦେବା
ଦିଗରେ ଓର୍ମାସ୍ର ପ୍ରୟାସକୁ ପ୍ରଶଂସା କରିଥିଲେ ।
ୟୁନିଟ୍ ୮ ସ୍ଥିତ ଏସ୍ଆଇଆର୍ଡି କ୍ୟାମ୍ପସ୍ରେ ଆୟୋଜିତ ମେଳା ଜୁନ ୧ରୁ ୫ ତାରିଖ
ପର୍ଯ୍ୟନ୍ତ ଚାଲିଥିଲା । ଏଥିରେ ଓଡ଼ିଶାର ୯ଟି ଜିଲ୍ଲାରୁ ଆମ୍ବଚାଷୀ ଓ ଉତ୍ପାଦକ ଗୋଷ୍ଠୀ ଭାଗ
ନେଇଥିଲେ । ଏହି ୫ ଦିନିଆ ଆମ୍ବ ମେଳାରେ ୩୬ ମେଟି୍ରକ୍ ଟନ୍ ଆମ୍ବ ବିକି୍ର ହୋଇଥିବାବେଳେ
୧୯ ଲକ୍ଷରୁ ଅଧିକ ଟଙ୍କାର ବ୍ୟବସାୟ ହୋଇଛି ।
